Tanaji Sawant Health : शिंदे गटाचे आमदार तानाजी सावंत यांची प्रकृती बिघडली; अँजिओप्लास्टी होण्याची शक्यता

माजी मंत्री आणि शिंदे गटाचे आमदार तानाजी सावंत यांची तब्बेत बिघडली असून त्यांच्यावर रुग्णालयात उपचार सुरु असल्याची बातमी समोर आली आहे. शनिवारी दुपारच्या सुमारास त्यांना रुग्णालयात दाखल करण्यात आले. तानाजी सावंत यांच्यावर पुण्यातील रुबी हॉल क्लिनिकमध्ये अँजिओप्लास्टी करण्यात येण्याची शक्यता आहे. मात्र आता त्यांची प्रकृती ठीक असल्याचे म्हटले जात आहे.

माजी मंत्री आणि शिंदे गटाचे आमदार तानाजी सावंत यांची तब्बेत बिघडली. शनिवारी दुपारी ४:३० च्या सुमारास त्यांना रुग्णालयात दाखल करण्यात आले. तानाजी सावंत यांना दुपारच्या सुमारास ससून रोड येथे चक्कर येणे, उलटी होणे आणि हृदयाची धडधड वाढणे अशा प्रकारचा त्रास होत होता. त्यामुळे सावंत यांना तातडीने रुग्णालयात दाखल करण्यात आले.

रुग्णालयात दाखल होताच आपत्कालीन वैद्यकीय पथकाने त्यांची तत्काळ तपासणी केली. या तपासणी नंतर अधिक तपासणी व निरीक्षणासाठी त्यांना रुग्णालयात भरती करण्यात आले आहे. सध्या ते डॉ. पुर्वेज के. ग्रँट (मुख्य हृदयरोगतज्ज्ञ) आणि तज्ज्ञ डॉक्टरांच्या बहुवैद्यकीय पथकाच्या देखरेखीखाली आहेत. त्यांच्या लक्षणांचे मूळ कारण शोधण्यासाठी सर्व आवश्यक तपासण्या करण्यात येत आहेत.

दरम्यान मिळालेल्या माहितीनुसार, आमदार तानाजी सावंत यांची प्रकृती ठीक असून त्यांच्यावर अँजिओप्लास्टी होण्याची शक्यता आहे.