राष्ट्रपती पदासाठी भाजपच्या उमेदवाराला पाठिंबा द्या; शिवसेना खासदाराची उद्धव ठाकरेंकडे मागणी

मुंबई: आदिवासी समाजातील सक्षम आणि कतृत्त्ववान महिला म्हणून शिवसेनेने भाजपाप्रणित राष्ट्रीय लोकशाही आघाडीच्या उमेदवार श्रीमती द्रौपदी मुर्मू यांना पाठिंबा द्यावा, अशी लेखी मागणी खासदार राहुल शेवाळे (MP Rahul Shewale) यांनी पक्षप्रमुख उद्धव ठाकरे (Uddhav Thackeray) यांच्याकडे केली आहे. याविषयीचे पत्र खासदार शेवाळे यांनी उद्धव ठाकरे यांची शिवसेना भवनात भेट घेऊन त्यांना सादर केले.

या पत्रात खासदार शेवाळे यांनी द्रौपदी मुर्मू (Draupadi Murmu) यांच्या संवेदनशील सामाजिक आणि यशस्वी राजकीय वाटचालीची प्रशंसा केली आहे. तसेच वंदनीय बाळासाहेब ठाकरे यांनी पक्षीय राजकारणाला छेद देत, महाराष्ट्राची कतृत्त्ववान महिला देशाच्या सर्वोच्च पदावर विराजमान व्हावी, याच हेतूने माजी राष्ट्रपती मा. श्रीमती प्रतिभाताई पाटील यांना राष्ट्रपती पदासाठी पाठिंबा दर्शविला होता.

पाहा व्हिडीओ -

तसंच दिवंगत माजी राष्ट्रपती प्रणव मुखर्जी यांच्या कतृत्त्वाचा आदर करत त्यावेळी देखील शिवसेनेने (Shivsena) त्यांना पाठिंबा दर्शविला होता. हीच परंपरा कायम ठेवत, आदिवासी समाजातील एका कतृत्त्ववान महिलेचा सन्मान करण्यासाठी शिवसेना पक्षाने श्रीमती द्रौपदी मुर्मू यांना पाठिंबा द्यावा आणि त्यासाठी पक्षाच्या सर्व खासदारांना आदेश द्यावा, अशी विनंती खासदार शेवाळे यांनी उद्धव ठाकरेंकडे केली आहे.

मात्र, सध्या राज्यातील राजकीय संघर्ष पाहता भाजप (BJP) आणि शिवसेनेमध्ये टोकाचा संघर्ष सुरु असताना. शिवसेना आपला पाठिंबा भाजपविरोधी उमेदवाराला देणार की, एनडीए पुरस्कृत उमेदवाराला देणार हे पाहण महत्वाचं ठरणार आहे.

Edited By - Jagdish Patil