Shubhada Kodare Case : शुभदा कोदारे हत्या प्रकरणात मोठी अपडेट, राष्ट्रीय महिला आयोगाने घेतला महत्त्वपूर्ण निर्णय

Subhada Kodare Case Status : पुणे शहरात आयटी कंपनीमध्ये काम करणारी शुभदा कोदारे या तरुणीचा खून करण्यात आला होता. शुभदाच्या ऑफिसमधील सहकाऱ्याने आर्थिक वादातून तिच्यावर चॉपरने हल्ला केला होता. या प्रकरणी आरोपी कृष्णा कनोजाला पोलिसांनी ताब्यात घेतले. शुभदा कोदारे हत्या प्रकरणाबद्दल नवी अपडेट समोर आली आहे. या हत्या प्रकरणी राष्ट्रीय महिला आयोगाची समिती उद्या (१५ जानेवारी) पुण्यात दाखल होणार आहे.

मिळालेल्या माहितीनुसार, पुण्यातील शुभदा कोदारे हत्या प्रकरणाची दखल राष्ट्रीय महिला आयोगाने घेतली. या प्रकरणासाठी आयोगाकडून विशेष समिती स्थापन करण्यात आली आहे. राष्ट्रीय महिला आयोगाकडून फॅक्ट फायंडिंग कमिटी (घटनेतील तथ्य शोधणारी समिती) संपूर्ण प्रकरणाचा तपास करणार आहे.

दरम्यान आयोगाची समिती पुण्यात दाखल झाल्यानंतर सर्व प्रमुख अधिकाऱ्यांची बैठक घेतली जाणार आहे. या बैठकीला राष्ट्रीय महिला आयोगाच्या समितीतील सर्व प्रमुख अधिकारी, पुणे जिल्हाधिकारी. अपर पोलीस आयुक्त, पोलीस उपायुक्त उपस्थित राहणार असल्याचे म्हटले जात आहे. तसेच डब्लूएनएस कंपनीचे संचालक आणि सुरक्षा अधिकारी यांनाही बैठकीला हजर राहण्याच्या सूचना करण्यात आल्या आहेत.

पुढील १० दिवसांमध्ये विशेष समितीकडून हत्या प्रकरणाचा अहवाल देण्याचे निर्देश महिला आयोगाने दिले आहेत. आयोगाच्या समितीमध्ये केरळच्या माजी पोलीस महासंचालक आर. श्रीलेखा, हरियाणाच्या माजी पोलीस महासंचालक डॉ. बी. के. सिन्हा आणि राष्ट्रीय महिला आयोगाच्या सचिव मीनाक्षी नेगी यांचा सहभाग आहे. समितीच्या तपासामुळे या हत्या प्रकरणाला वेग येणार असल्याचे म्हटले जात आहे.