Liver Transplant: यकृत प्रत्यारोपण दांम्पत्याच्या जीवावर बेतलं; डॉक्टरांचा हलगर्जीपणा,नातेवाईकांचा आरोप

नवऱ्याचा जीव वाचावा म्हणून कामिनी कोमकरने बारु कोमकरसाठी यकृत दान केलं.. मात्र हेच यकृत प्रत्यारोपण कोमकर दांम्पत्याच्या जीवावर बेतलं आणि वेदांत आणि रुतिका क्षणात अनाथ झाले..होय...ही घटना घडलीय पुण्यातील नामांकित सह्याद्री हॉस्पिटलमध्ये.मात्र कोमकर दाम्पत्याच्या मृत्यूला डॉक्टरांचा हलगर्जीपणा भोवल्याचा आरोप नातेवाईकांनी केलाय.

खरंतर बारु कोमकर यांना यकृत प्रत्यारोपणाची गरज होती.त्यामुळे त्यांना सह्याद्री हॉस्पिटलमध्ये दाखल केलं. तर बारुची पत्नी कामिनीने नवऱ्यासाठी आपलं यकृत दान करण्याचा निर्णय घेतला. त्यासाठी हॉस्पिटलने 12 लाख रुपये भरायला सांगितले. कर्ज काढून पैसे जमा केले. ऑपरेशनही झालं. मात्र यकृत प्रत्यारोपणाच्या दुसऱ्याच दिवशी बारुचा तर अवघ्या आठवडाभरातच कामिनीचा मृत्यू झाला..आता हॉस्पिटल प्रशासनाच्या हलगर्जीपणामुळे आई वडील गमावलेल्या वेदांतला करुण कहाणी सांगताना हुंदका आवरता आला नाही.

हॉस्पिटलच्या हलगर्जीपणामुळेच कोमकर दांम्पत्याचा मृत्यू झाल्याचा आरोप करत नातेवाईकांनी पोलिसांत तक्रार दाखल केलीय. दुसरीकडे हॉस्पिटलने मात्र या प्रकरणी आपला काही दोष नसल्याचं सांगत स्पष्टीकरण दिलंय.यकृत प्रत्यारोपण ही अत्यंत गुंतागुंतीची शस्त्रक्रिया असते.. यकृत प्रत्यारोपण करण्यासाठीचा रुग्ण जोखमीचा होता. त्याची कल्पना नातेवाईकांना दिली होती.

नातेवाईकांचं समुपदेशनही केलं होतं. दुर्दैवानं यकृत प्राप्तकर्त्याला कार्डियोजनिक शॉक आला आणि त्यात त्याचा मृत्यू झाला. दुसरीकडे यकृत दाता आधी बरा झाला.. त्यानंतर आठवडाभराने त्यांना सेप्टिक शॉक आणि मल्टीऑर्गन फेल्यूअरमुळे त्यांचा मृत्यू झाला..कुटुंबासोबत आमच्या संवेदना आहेत. आता कोमकर कुटुंबाने सह्याद्री हॉस्पिटलविरोधात पोलीसात तक्रार दिली असली तरी या प्रकरणाची सखोल चौकशी होऊन हॉस्पिटलवर कारवाई होणार का? याकडे लक्ष लागलंय.