मराठा समाजाबाबतच्या वादग्रस्त वक्तव्यावर जयंत पाटलांची सडकून टीका; म्हणाले, मस्ती वाढली...

पुणे: आरोग्यमंत्री तानाजी सावंत (Tanaji Sawant) यांच्या तोंडून फडणवीस बोलतायत म्हणून ते असं वक्तव्य करू शकतात, थोडक्यात काय तर सत्तेची मस्ती वाढली आहे, अशी घणाघाती टीका करत राष्ट्रवादीचे काँग्रेसचे प्रदेशाध्यक्ष जयंत पाटील (Jayant Patil) केली आहे.

एकनाथ शिंदे सरकारमधील आरोग्यमंत्री तानाजी सावंत यांनी मराठा (Maratha Reservation) समाजाच्या आरक्षणाबाबत केलेल्या वादग्रस्त वक्तव्यामुळे राज्यभरात त्यांचा निषेध केला जात आहे. या वक्तव्याबाबत तानाजी सावंतांनी माफी मागितली असली तरिही त्यांच्या हकालपट्टीची मागणी विरोधकांकडून केली जात आहे.

अशातच आता राष्ट्रवादी काँग्रेसचे प्रदेशाध्यक्ष जयंत पाटील यांनी सावंतांवर सडकून टीका केली, तानाजी सावंतांच्या तोंडून फडणवीस बोलतायत म्हणून ते असं वक्तव्य करू शकतात, थोडक्यात काय तर त्यांना सत्तेची मस्ती आली आहे. अशी टीका पाटील यांनी केली.

पाहा व्हिडीओ -

पाटील यांनी यावेळी राज्य सरकारसह केंद्र सरकारवरही निशाणा साधला आहे. राज्य सरकार घाबरतय म्हणून महापालिकेच्या निवडणूका पुढे ढकलतायत. देशात न्याय जिवंत असेल तर उद्या होणाऱ्या सुनावणीमध्ये आमचा विजय होईल. शिवाय न्यायालयामध्ये आमदारांना निलंबित केले तर मध्यावधी निवडणुका होऊ शकतात अशी शक्यता देखील वर्तवली आहे.

केंद्र सरकारला सीबीआय आणि न्यायालय या शिवाय दुसर काही सुचत नाही, तपास यंत्रणांकडून पीएफआय बद्दल माहिती अपेक्षित होती, त्यावर वेळीच कारवाई अपेक्षित होती पण केंद्र सरकरचे नियंत्रण नसल्यामुळे पाकिस्तान जिंदाबाद घोषणा द्यायला हे धजावले असंही ते म्हणाले.

तसंच भाजप प्रदेशाध्यक्ष चंद्रशेखर बावनकुळेंनी त्यांना मंत्रिपद का मिळाले नाही ते पाहावे, अजित पवारांची काळजी करू नये, अजितदादा आमच्याशी बोलणार की त्यांच्याशी असा टोला ही त्यांनी बावनकुळेंना यावेळी लगावला.

Edited By - Jagdish Patil