Shivsena : धनुष्यबाण गोठवण्याच्या निर्णयाला स्थगिती?; आज हायकोर्टात सुनावणी

Shivsena Political Crisis : केंद्रीय निवडणूक आयोगाने (Election Commission) शिवसेनेचं धनुष्यबाण चिन्ह गोठवलं. त्यानंतर उद्धव ठाकरे (Uddhav Thackeray) यांच्या गटाने दिल्ली हायकोर्टात धाव घेतलीय. चिन्ह गोठवण्याच्या निर्णयाला स्थगिती द्या, अशी मागणी करणारी याचिका ठाकरे गटाकडून दिल्ली हायकोर्टात दाखल करण्यात आली. या याचिकेवर आज सुनावणी होणार आहे. (Uddhav Thackeray News Today)

निवडणूक आयोगाने शिवसेनेचे धनुष्यबाण चिन्ह गोठवले असून शिंदे आणि ठाकरे गटाला शिवसेनेचे नाव पुढील आदेशापर्यंत वापरता येणार नाही. केंद्रीय निवडणूक आयोगाने यासंदर्भात अंतरिम आदेश दिले. त्याचबरोबर दोन्ही गटांना नवीन चिन्हासाठी तीन-तीन नावं सूचवण्याचे आदेश दिले होते.

अंधेरी पोटनिवडणूक तोंडावर असताना, ठाकरे गटाने नवीन निवडणूक चिन्हासाठी निवडणूक आयोगाकडे त्रिशूल, उगवता सुर्य आणि मशाल हे तीन पर्याय सूचवले. यातील मशाल हे चिन्ह निवडणूक आयोगाने ठाकरे गटाला दिलं आहे. तर एकनाथ शिंदे यांच्या गटाला नवीन तीन चिन्ह सूचवण्याचे आदेश निवडणूक आयोगाने दिले आहेत. (Breaking Marathi News)

दरम्यान, धनुष्यबाण चिन्ह गोठवण्याचा निर्णय निवडणूक आयोगाने घाईगडबडीत घेतला, असं म्हणत ठाकरे गटाने दिल्ली हायकोर्टात धाव घेतली आहे. निवडणूक आयोगाच्या निर्णयाला स्थगिती द्या अशी मागणी करणारी याचिका ठाकरे गटाकडून हायकोर्टात दाखल करण्यात आली.

या याचिकेवर आज सुनावणी होण्याची शक्यता आहे. त्यामुळे दिल्ली हायकोर्ट निवडणूक आयोगाच्या निर्णयाला स्थगिती देतं की चिन्ह गोठवण्याचा निर्णय योग्य ठरवतं हेच पाहणं महत्वाचं ठरणार आहे.

आमच्यावर अन्याय झाला : CM एकनाथ शिंदे

'आमचीच शिवसेना खरी शिवसेना आहे. देशातील 14 राज्यप्रमुखांनी देखील त्यांच्या राज्यातील शिवसेनेचं समर्थन आम्हाला दिलेलं आहे. असं हे भरघोस पाठिंबा आणि समर्थन आमच्याकडे म्हणजेच बाळासाहेबांच्या शिवसेनेकडे असताना, धनुष्यबाण चिन्ह आम्हालाच मिळालं पाहिजे होते. परंतू, ते आम्हाला मिळालं नाही. हा आमच्यावरचा खरा अर्थाने अन्याय आहे', असं मुख्यमंत्री एकनाथ शिंदे यांनी म्हटलं आहे.

Edited By - Satish Daud