Mumbai News : स्वप्न भंगल, पैसेही गेले! रजनीकांत यांच्या नावाने अभिनेत्रीची लाखो रुपयांची फसवणूक, दोन आरोपींविरोधात तक्रार दाखल

>> संजय गडदे

मुंबई : सिनेसृष्टीतील सुपरस्टार रजनीकांत यांच्या नावाने एका अभिनेत्रीची लाखो रुपयांची फसवणूक केल्याचा प्रकार मुंबईत समोर आला आहे. याप्रकरणी दोन आरोपींविरोधात वर्सोवा पोलीस स्टेशनमध्ये गुन्हा दाखल झाला आहे. (Mumbai News)

आगामी जेलर आणि पुष्पा दोन या चित्रपटांमध्ये मुख्य भूमिका देण्याचे बतावणी करून अंधेरी येथील नवोदित अभिनेत्रीची तब्बल साडेआठ लाख रुपयांची फसवणूक करण्यात आली आहे. याप्रकरणी अभिनेत्रीच्या आईने वर्सोवा पोलीस ठाण्यात फसवणूक केल्याप्रकरणी गुन्हा दाखल केला आहे. पियुष जैन आणि समीर अशी या दोघांची नावे आहेत.

इंस्टाग्राम या सोशल मीडियावर आरोपी आणि पीडिता यांची ओळख झाली होती. यानंतर आरोपींनी पीडितेच्या इंस्टाग्रामवर एक फ्रेश चेहरा आगामी चित्रपटासाठी शोधत आहोत असा मेसेज पाठवला. पीडितेने चित्रपटात काम करण्याची इच्छा व्यक्त केल्यानंतर त्यांनी एक फोटो व्हॉट्सअॅपवर मागून घेतला. त्यानंतर आरोपींनी रजनीकांत आणि पीडितेचे चित्रपटाचे एक पोस्टर तयार करून पीडितेला व्हॉट्सअॅपवर पाठवले.

रजनीकांच यांच्या आगामी चित्रपटात आपण तुम्हाला संधी देऊन असी थाप आरोपींनी पीडितेला मारली. दोन्ही आरोपींना पीडितेला विश्वासात घेतलं. त्यानंतर पियुष नावाच्या व्यक्तीने पासपोर्ट आणि फ्रान्समध्ये होणाऱ्या शूटिंगसाठी विजा गरजेचा असल्याने त्यासाठी साडेआठ लाख रुपये ऑनलाईन मागवून घेतले. मागणीप्रणाणे पीडितेने पैसे देखील दिले.

मात्र त्यानंतर ना विजा आला ना चित्रपटाच्या शूटिंगसाठी फ्रान्सला नेण्यात आलं. फसवणूक झाल्याचे लक्षात येतात या नवोदित अभिनेत्रीच्या आईने पोलीस ठाण्यात धाव घेऊन या दोघांविरोधात तक्रार दिली आहे. सध्या दोन्हीही आरोपी फरार असून वर्सोवा पोलीस त्यांचा शोध घेत आहेत.