Maharashtra Politics: उद्धव ठाकरे होणार का मुख्यमंत्रीपदाचा चेहरा? काँग्रेस, राष्ट्रवादीच्या भूमिकेने सस्पेन्स कायम; काय आहे 'मविआ'मधील अंतर्गत राजकारण? वाचा...

राज्यात विधानसभा निवडणुकांचे वारे वाहू लागताच महाविकास आघाडीमध्ये मुख्यमंत्रीपदाच्या चेहऱ्यावरुन दावे प्रतिदावे अन् चर्चा रंगू लागल्या आहेत. शिवसेनाप्रमुख उद्धव ठाकरे हे महाविकास आघाडीच्या मुख्यमंत्रीपदाचा चेहरा बनू शकतात अशी शक्यता आहे मात्र राष्ट्रवादी शरद पवार गट आणि काँग्रेसकडून मात्र याबाबत जाहीरपणे भूमिका न घेतल्याने ठाकरेंच्या चेहऱ्याला मविआमधूनच विरोध आहे का? असा सवाल उपस्थित होत आहे. महाविकास आघाडीची स्थापना, शिवसेनेमध्ये फूट आणि त्यानंतर उद्धव ठाकरेंबाबत तयार झालेली सहानुभूतीच्या लाटेमुळे राजकीय समीकरण बदलून गेले आहे. आता खरच उद्धव ठाकरे मुख्यमंत्रीपदाचा चेहरा बनतील का? काय आहे मविआमधील समीकरण अन् अंतर्गत राजकारण? वाचा सविस्तर....

लोकसभेत महायुतीला धक्का!

उद्धव ठाकरे यांच्या नेतृत्वाखाली महाविकास आघाडीने लोकसभा निवडणुकीत महाराष्ट्रात 48 पैकी 31 जागा जिंकून महायुतीचा दारुण पराभव दिला. हा विजय मविआसाठी मोठे यश आहे आणि त्यामुळे उद्धव ठाकरेंचा आत्मविश्वास आणखी वाढला आहे. आता उद्धव ठाकरेंची नजर राज्याच्या विधानसभा निवडणुकीकडे आहे, जिथे त्यांना पुन्हा एकदा मुख्यमंत्रीपदावर दावा करायचा आहे. मात्र मविआमध्येही राजकारण बदलले आहे. लोकसभा निवडणुकीदरम्यान शिवसेना (UBT) आणि काँग्रेस यांच्यात जागावाटपावरून अनेकवेळा वाद निर्माण झाले, पण ठाकरे आणि गांधी कुटुंबातील समीकरण अबाधित राहिले.

सर्वाधिक जागा लढवूनही ठाकरे कमकुवत...

शिवसेनेच्या मुखपत्र असलेल्या 'सामना'मधून राहुल गांधींना भारत आघाडीचा चेहरा बनवण्याचा सल्ला देण्यात आला, तर इतर काही मित्रपक्षांनी राहुल गांधींच्या नावाला विरोध केला होता. लोकसभा निवडणुकीनंतर मविआमधील समीकरणे बदलत आहेत. सर्वाधिक जागा लढवूनही ठाकरे गटाची स्थिती आता कमकुवत मानली जात आहे. काँग्रेसने 17 पैकी 13 जागा जिंकल्या तर ठाकरेंना 21 पैकी केवळ 9 जागा मिळाल्या. शरद पवारांच्या राष्ट्रवादी काँग्रेसने 10 पैकी 8 जागा जिंकून स्वतःला मजबूत स्थितीत ठेवलं आहे.

उद्धव ठाकरे होणार का मुख्यमंत्रीपदाचा चेहरा?

शिवसेना ठाकरे गटाची स्थिती कमकुवत झाल्याने उद्धव ठाकरे यांच्या मुख्यमंत्रिपदाच्या उमेदवारीवरही प्रश्नचिन्ह निर्माण झाले आहे. काँग्रेसने केलेल्या अंतर्गत सर्व्हेक्षणात उद्धव ठाकरेंची लोकप्रियता कमी होत आहे. उद्धव ठाकरे यांनी दिल्लीत काँग्रेस नेतृत्वाची भेट घेऊन मुख्यमंत्रीपदाच्या सूत्रात बदल करण्याची मागणी केली. सर्वाधिक जागा मिळवणाऱ्या पक्षाला मुख्यमंत्रिपद देण्याचा पारंपरिक फॉर्म्युला युती कमकुवत करतो, असे त्यांचे म्हणणे आहे.

मविआमध्येच राजकारण रंगणार?

मुख्यमंत्रिपदाच्या दावेदारीवरून मविआमध्ये कलह आणखी वाढला आहे. मुख्यमंत्रिपदाचा चेहरा घोषित केला तरच पक्षातील नेते आणि समर्थकांना एकजूटीने ठेवता येईल, याची जाणीव उद्धव ठाकरेंना झाली आहे. दुसरीकडे एकनाथ शिंदेंनी बंडखोरीनंतरही ठाकरेंना तगडे आव्हान दिले आहे. मात्र द्धव ठाकरेंच्या उमेदवारीवरून आघाडीमध्ये मतभेद निर्माण होत आहेत.

कधी होणार निर्णय?

आता त्यांना मुख्यमंत्रिपदाचा चेहरा घोषित केल्यास भाजपकडून विशेषत: हिंदुत्वाच्या मुद्द्यावरून जोरदार पलटवार केला जाईल. ही परिस्थिती काँग्रेस आणि शरद पवार यांच्या 'सेक्युलर' व्होट बँकेसाठी अडचणी निर्माण करू शकते. अशातच निवडणूक आयोगाने राज्यातील विधानसभा निवडणुका पुढे ढकलल्या आहेत. त्यामुळे अंतिम निर्णय हा जागा वाटपाच्या अंतिम चर्चेत मुख्यमंत्रीपदाचा निर्णय होईल अशी शक्यता आहे.