Maharashtra Politics: सत्ता जाताच उद्धव ठाकरेंच्या चेहऱ्यावरचा मास्क उतरला; दीपक केसरकर यांची बोचरी टीका

सचिन बनसोडे, शिर्डी

Deepak Kesarkar Latest News: सत्ता जाताच उद्धव ठाकरेंच्या तोंडावरचा मास्क उतरला अशी बोचरी टीका शिंदे गटाचे आमदार तथा राज्याचे शालेय शिक्षण मंत्री दीपक केसरकर यांनी केली आहे. तसेच संजय राऊत जे बोलतात त्याच्या उलट महाराष्ट्रात घडतं असं म्हणत त्यांनी राऊतांवरही निशाणा साधला आहे. दिपक केसरकर (Deepak Kesarkar) हे हिवाळी अधिवेशनासाठी नागपूरला रवाना होण्यापूर्वी शिर्डीत साईबाबांच्या दर्शनाला पोहचले. यावेळी दीपक केसरकर यांनी प्रसार माध्यमांशी संवाद साधताना ही बोचरी टीका केली आहे. (Latest Marathi News)

दीपक केसरकर म्हणाले की, उद्धव ठाकरे (Uddhav Thackeray) आता रस्त्यावर उतरले हे चांगले आहे. मात्र ज्यावेळी लोकांसाठी रस्त्यावर उतरण्याची संधी होती तेव्हा उतरायला हवं होतं. जोपर्यंत सरकार अस्तित्वात होतं तोपर्यंत त्यांच्या चेहऱ्यावर मास्क होता मात्र, सत्ता जाताच दुसऱ्या क्षणी मास्क तो उतरला अशी बोचरी टीका त्यांनी केली. तसेच उद्धव ठाकरे यांची आमच्यासारख्या आमदारालासुद्धा भेट मिळत नसल्याने महाराष्ट्र ठप्प झाला होता. विरोधी पक्षांमध्ये गेल्यावर महाराष्ट्र ऍक्टिव्ह झाला का..? असा सवाल करत केसरकर यांनी उद्धव ठाकरेंवर निशाणा साधला आहे. (Maharashtra News)

संजय राऊतांना टोला

मंत्री दीपक केसरकरांनी यावेळी संजय राऊतांनाही टोला लगावला आहे, ते म्हणाले संजय राऊक जे बोलतात त्याच्या उलटं महाराष्ट्रात घडतं. त्यांनी वाईट बोललं की चांगलंच होत असतं. ज्यांच्याबद्दल संजय राऊत वाईट बोलले ती लोक मोठीचं झाली. संजय राऊतांनी दररोज वाईट बोलत राहावं, आम्ही आमचं काम चालूच ठेऊ असा टोला केसरकर यांनी संजय राऊतांना लगावला आहे.

पुढे ते म्हणाले की, विरोधी पक्ष हा आंदोलन करतच असतो. मात्र नागरिकांच्या भावना भडकावण्याचा प्रयत्न सुरू असून त्यांच्याकडे लक्ष देण्याची गरज नाही. हिंदू देव-देवतांचा अपमान करणाऱ्यांना तुम्ही डोक्यावर घेऊन नाचता आणि दुसरीकडे महाराष्ट्र प्रेमी असल्याचं भासवता. संत लोकांचा अपमान करणाऱ्यांना बरोबर घेऊन जाताना सुद्धा तुम्हाला काही वाटत नाही. अशी टीका केसरकर यांनी ठाकरे गटावर केली आहे.

Edited By - Akshay Baisane