पीपीई किटमुळे कोरोनाबधितांच्या मृतदेहाचं संथ विघटन; महामारीनंतरचं धक्कादायक वास्तव

नाशिक - कोरोनानंतरही या महामारीचे दुष्परिणाम अद्यापही पाहायला मिळत आहे. कोरोनामुळे (Corona) मृत झालेल्या रुग्णांच्या मृतदेहांवर प्लॅस्टिकचं आच्छादन आणि पीपीई किट लावल्यामुळे दफनविधीनंतर तब्बल 2 वर्षांनंतरही मृतदेहाचं पूर्णपणे विघटन होत नसल्याची धक्कादायक बाब समोर आली आहे. पीपीई किटमुळे विघटन संथ गतीने होत असल्यानं 2 वर्षांनंतरही मृतदेहांच पूर्णपणे विघटन न झाल्यानं नाशिकच्या (Nashik) कब्रस्तानात दफनविधीसाठी जागाचं शिल्लक नसल्यानं नव्या दफनविधीसाठी जागा आणायची कुठून? असा प्रश्न निर्माण झाला आहे.

हे देखील पहा -

नाशिकमध्ये मुस्लिम समाजाचे 4 कब्रस्तान असून कोरोना काळात जुन्या नाशिकमधील कब्रस्तानात दिवसाला 15 ते 16 मृतदेह दफनविधीसाठी येत होते. सर्व सामान्यपणे मृतदेहाचं पूर्णपणे विघटन होण्यासाठी 14 ते 18 महिने लागतात. त्यामुळे नव्या दफनविधीसाठी जागेची अडचण आल्यानंतर साधारणपणे 2 वर्षांनंतर कबरी पुन्हा उघडल्या जातात. मात्र पीपीई किटमुळे विघटन संथ गतीने होत असल्यानं 2 वर्षांनंतर या कबरी उघडल्यानंतर कबरीतील प्लॅस्टिक मृतदेहाचे अंश दिसत असल्याचं धक्कादायक वास्तव समोर आलंय. या ठिकाणी निर्माण झालेल्या या परिस्थितीमुळे नव्या जागेचा शोध घेण्याची वेळ कब्रस्तानच्या विश्वस्तांवर आली आहे.

मृतदेहाच्या विघटनाची प्रक्रिया काही तासात सुरू होते. सामान्यतः जमीन, वातावरण आणि तापमानावर विघटनाची प्रक्रिया अवलंबून असते. मात्र 14 ते 18 महिन्यात मृतदेहावरील संपूर्ण मांसाचं विघटन होऊन हाडांचा सांगाडा शिल्लक राहतो. हाडांच्या सांगाड्याचं पूर्ण विघटन होण्यासाठी अडीच ते तीन वर्षांचा कालावधी लागतो.