Shahapur : आदिवासी बांधवांच्या यातना संपेनात; रस्ता नसल्याने गरोदर महिलेला नेले झोळीत टाकून

फैय्याज शेख 

शहापूर : आदिवासी पाड्यांवर आजही रस्त्यांची सुविधा नाही कि आरोग्याची सुविधा. यामुळे पाड्यांवरील आदिवासी बांधवांच्या यातना संपता संपत नसल्याचे भयान वास्तव पाहण्यास मिळत आहे. याची प्रचिती पुन्हा एकदा आली असून रस्ता नसल्याने प्रसव वेदना सुरु झाल्याने या गरोदर महिलेला झोळी करून त्यात टाकून पाड्यापासून रुग्णवाहिकेपर्यंत घेऊन जावे लागले आहे. 

शहापूर तालुक्यातील नडगाव ग्रामपंचायत हद्दीतील चाफेवाडी ही आदिवासी वाडी आहे. या वाडीत जाण्यासाठी रस्ता नाही. अनेक वेळा रस्त्याची मागणी करून देखील रस्ता होत नाही. स्थानिक नेते तसेच लोकप्रतिनिधी याकडे दुर्लक्ष करत आहेत. यामुळे वाडीतील नागरिकांना पायपीट करतच यावे लागत असते. आता पावसाळा सुरु झाल्याने हे चित्र अधिक भीषण होताना दिसणार आहे. दरम्यान आज घडलेल्या घटनेने याची प्रचिती आली आहे. 

रुग्णवाहिका आली पण.. 

चाफेवाडीतील गरोदर महिलेच्या पोटात दुखू लागल्याने तिला रूग्णालयात घेऊन जाण्यासाठी रूग्णवाहिका मागविण्यात आली. मात्र पाड्यापर्यंत जाण्यासाठी रस्ता नसल्याने रूग्णवाहिका पक्क्या रस्त्यावर थांबविण्यात आली होती. या रुग्णवाहिकेपर्यंत गरोदर महिलेला डोली करून घेऊन जाण्यात आले. सदर महिलेचे नाव संगीता रवींद्र मुकणे असून तिला वेळेवरती उपचारासाठी शहापूर रुग्णालयापर्यंत घेऊन जाण्यासाठी वेळ झाल्याने सदर महिलेला शहापूर येथील उपजिल्हा रुग्णालयातून ठाणे येथील रुग्णालयात रवानगी करण्यात आली आहे. 

मुख्य रस्त्यापर्यंत जाण्यासाठी रस्त्याचं नाही 

नडगाव ग्रामपंचायत हद्दीतील चाफेवाडी ते मुख्य रस्त्यापर्यंत जाण्यासाठी खासगी शेत जमीन असल्याने शेतकरी रस्ता देत नाही. या कारणाने अनेक वेळा मागणी असून सुद्धा रस्ता होऊ शकला नाही. यामुळे आजही या भागातील भयान वास्तव्य समोर आले आहे. एका गरोदर महिलेला रुग्नेवाहिकेपर्यंत घेऊन जाण्यासाठी चक्क डोली सहारा घ्यावा लागला आहे.