Kasara Ghat Accident : नवीन कसारा घाटात भीषण अपघात; कंटेनर दरीत कोसळला, पाच ते सहा जण अडकले

फैय्याज शेख 

शहापूर : शहापूर तालुक्यातील नवीन कसारा घाटात नाशिकहून मुंबईच्या दिशेने जाणाऱ्या कंटेनर चालकाचा ताबा सुटल्याने कंटेनर कसारा घाटातील खोल दरी कोसळला आहे. या कंटेनरमध्ये पाच ते सहा जण प्रवास करत असल्याची माहिती समोर येत आहे. घटनास्थळी कसारा पोलिस आपत्ती व्यवस्थापनचे सदस्य असुन दरीतून बाहेर काढण्याचे प्रयत्न सुरू आहे.

नवीन कसारा घाटातील (Kasara Ghat) बलगर पाॅईटजवळ हा भीषण अपघात झाला आहे. नाशिकहून मुंबईच्या दिशेने निघालेला कंटेनर कसारा घाटात आल्यानंतर घाट रस्त्यावर उतार असल्याने कंटेनर चालकाचा ताबा सुटला. यात कंटेनर थेट घाटातील खोल दरीत कोसळला. या कंटेनरमध्ये पाच ते सहाजण प्रवास करत असल्याचे समोर आले असून यात सुदैवाने कोणतीही जीवितहानी झाली नसल्याची माहिती सध्या समोर येत आहे. 

दरम्यान (Accident) अपघात झाल्याची माहिती मिळताच पोलीस व आपत्ती व्यवस्थापन टीम घटनास्थळी दाखल होऊन मदतकार्य सुरु केले आहे. यात आतापर्यंत तीन जणांना बाहेर काढण्यात यश आले असून जखमींना कसारा रूग्णालयात उपचारासाठी दाखल करण्यात आले असून यात एका लहान मुलाचा समावेश आहे. तर चार जण खाली अडकल्याची माहिती समोर येते आहे.