रायगडात आज शाळेची घंटा वाजली नाही; ऑनलाईनच शिक्षण सुरू

राजेश भोस्तेकर

रायगड : राज्य शासनाने (State Government) आज 24 जानेवारी पासून शाळा सुरू करण्याचे आदेश दिले असले तरी रायगडात मात्र शाळेची घंटा वाजलीच नाही. जिल्हा प्रशासनाकडून कोणतेही आदेश शाळा सुरू करण्याबाबत जारी केले नसल्याने रायगडमधील (Raigad) शाळा अद्याप सुरू झालेल्या नाहीत.

शासनाचे आदेश शाळा सुरू (Schools Reopen) करण्याबाबत आले असले तरी जिल्हा प्रशासनाकडून कोणतेही आदेश जाहीर केले नसल्याने शाळा प्रशासन शाळा सुरू करण्याबाबत द्विधा मनस्थितीत आहेत. त्यामुळे जिल्हा प्रशासनाकडून आदेश आल्यानंतरच शाळा सुरू करण्याचा निर्णय अनेक खाजगी शाळांनी घेतला आहे. एक दोन ठिकाणी जिल्ह्यात शाळा सुरू करण्यात आली आहे.

हे देखील पहा -

रायगडमधील कोरोना स्थिती;

रायगडात कोरोनाचा (Corona) प्रादुर्भाव हा वाढत असून रोज हजारच्या संख्येने रुग्ण बाधित होत आहेत. असे असले तरी कोरोना बाधित रुग्ण हे घरीच उपाचार घेत आहेत. सध्या जिल्ह्याची रुग्णसंख्या बारा हजारावर पोहचली आहे. शासनाने शाळा सुरू करण्याबाबत आदेश जारी केले असले तरी जिल्ह्यात कोरोनाची परिस्थिती पाहून अद्याप शाळा सुरू करण्याबाबत कोणतेही आदेश प्रशासनाने जारी केलेले नाहीत. त्यामुळे जिल्ह्यात आज 24 जानेवारी रोजी शाळेची घंटा वाजली नसल्याने ऑनलाईन वर्ग (Online Learning) अद्यापही सुरूच आहेत.