Maharashtra Politics: आता राजसेना विरूद्ध शिंदेसेना, 'गडकिल्ल्यांवरील नमो सेंटर फोडणार'

आगामी स्थानिक स्वराज्य संस्थांच्या निवडणुकीच्या तोंडावर शिंदेसेना विरुद्ध राज सेना आमने-सामने आले आहेत.. आणि त्याला कारण ठरलंय पंतप्रधान मोदींच्या पंचाहत्तरीच्या निमित्ताने छत्रपती शिवरायांच्या किल्ल्यावर सुरु करण्यात येणारे नमो टुरिझम सेंटर्स... उपमुख्यमंत्री एकनाथ शिंदेंनी नमो टुरिझम सेंटर्सची घोषणा केली आणि त्यावरुन राज ठाकरेंनी एकनाथ शिंदेंवर चांगलंच तोंडसुख घेतलं... नमो टुरिझम सेंटर्स उभे केले की फोडून टाकणार, असा थेट इशाराच राज ठाकरेंनी दिलाय..

राज ठाकरेंच्या टीकेनंतर आता शिंदेसेनेनेही राज ठाकरेंविरोधात मोर्चा उघडलाय.. तुम्ही नमो टुरिझम सेंटर्स फोडले तर आमचे हात बांधले आहेत का? असं म्हणत शिंदेसेना विरुद्ध राजसेना संघर्ष अटळ असल्याचे संकेत शिंदेसेनेनं दिलेत.. दुसरीकडे भाजपने तर थेट राज ठाकरेंचं कर्तृत्व काय? असा सवाल केलाय..

खरंतर शिवसेनेच्या फुटीनंतर राज ठाकरे आणि एकनाथ शिंदेंमध्ये भेटीगाठींचा सिलसिला सुरु होता.. त्यामुळे शत्रूचा शत्रू मित्र या सूत्रानुसार राजकीय समीकरणाचे आडाखे बांधले जात होते.. त्यातच राज ठाकरेंनी तर श्रीकांत शिंदेंसाठी प्रचार सभाही घेतली होती.. मात्र त्यानंतर विधानसभा निवडणुकीत राज ठाकरेंचा मुलगा अमित ठाकरेंविरोधात शिंदेंनी उमेदवार दिल्यानं राज ठाकरे नाराज झाले..

. आता ऐन महापालिका निवडणुकीच्या तोंडावर ठाकरे बंधू एकत्र आल्यास त्याचा फटका शिंदेसेनेला बसू शकतो.. त्यामुळे आतापर्यंत उद्धव ठाकरेंची कोंडी करण्यासाठी सरसावलेली शिंदेसेना यापुढं राजसेनेलाही शिंगावर घेण्याची शक्यता आहे.. त्यामुळे आगामी काळात शिंदेसेना विरुद्ध राजसेना संघर्ष तीव्र होणार हे मात्र निश्चित..