Raigad Crime : अनैतिक संबंधातून निवृत्त बँक कर्मचाऱ्याची हत्या, महिलेने जेवणात विष कालवून संपवलं

सचिन कदम 

रायगड : दोन दिवसांपूर्वी रायगडच्या श्रीवर्धन येथे निवृत्त बँक कर्मचारी रामदास खैरे यांचा मृतदेह सापडला होता. या मृत्यूच्या कारणांचा उलगडा करत पोलीस तपासातून धक्कादायक माहिती समोर आली आहे. यात एका महिलेने खैरे याना प्रेमाच्या जाळ्यात ओढून पैशांसाठी पतीच्या मदतीने हत्या केल्याची माहिती समोर आली आहे. यामुळे एकच खळबळ उडाली आहे. 

रायगडच्या (Raigad News) श्रीवर्धन येथे वास्तव्यास असलेले रामदास खैरे यांचा मृतदेह आढळून आला होता. याबाबत पोलिसांकडून तपास सुरु केल्यानंतर प्रेम प्रकरणातून हा प्रकार झाल्याची माहिती समोर आली होती. यानंतर पोलिसांनी (Police) याबाबत सखोल चौकशी केली असता अनैतिक संबधातुन रामदास खैरे यांची हत्या झाल्याचे समोर आले आहे. 

महिलेने प्रेम संबंधाचा केला बनाव 

रामदास खैरे यांच्याशी एका महिलेने प्रेम संबधांचा बनाव केला. संशयित आरोपी महिलेने रामदास खैरे यांना प्रेमाच्या जाळ्यात ओढून लग्‍नाचे आमिष दाखविले. (Crime News) इतकेच नाही तर त्‍यांच्याकडून दागिने आणि रोख रक्‍कम घेतली होती. दरम्यान खैरे यांनी सदर महिलेजवळ दिलेले दागिने आणि पैसे परत मागितले. मात्र महिलेकडून देण्यास टाळाटाळ केली जात होती. यामुळे सदर महिलेने खैरे याना संपविण्याचा कट रचला होता. 

जेवणात कीटकनाशक मिळवून केले ठार 

दागिने आणि पैशांसाठी तगादा लावला असता सदर महिलेने आपल्‍या पतीला सोबत घेवून खैरे यांना जेवणातून कीटकनाशक दिले. खैरे बेशुद्ध झाल्‍यानंतर त्यांना ठार मारून हे दोघेही फरार झाले. मात्र महिलेला तीच्या पतीसह रायगड पोलिसांच्या स्थानिक गुन्हे अन्वेषण विभागाचे अटक केली आहे. याचा अधिक तपास पोलीस करत आहेत.