अबब! पगारासाठी एसटी कर्मचाऱ्यांची विभागप्रमुखाविरोधात पोलिसात तक्रार

भंडारा : एसटी (ST) कर्मचाऱ्यांनी चक्क पगार वेळेत मिळत नसल्याच्या कारणावरून राज्य परिवहन महामंडळाच्या भंडारा विभागप्रमुखाविरोधात पोलिसात तक्रार दिल्याची घटना भंडाऱ्यात उघडकीस आली आहे. एसटी कर्मचाऱ्यांनी विभागप्रमुखाविरोधात पगारासाठी पोलिसात तक्रार केल्याची कदाचित हि पहिलीच घटना असावी.

हे देखील पहा -

राज्यातील एसटी कर्मचाऱ्यांना सात तारखेला वेतन देण्यात यावे अश्या सूचना शासनाकडून देण्यात आलेल्या असताना देखील भंडारा एसटी कर्मचाऱ्यांना जुलै पेड इनचा पगार ऑगस्ट महिना संपत आला असताना देखील अद्यापही देण्यात आलेला नाही. शिवाय पगार वेळेवर मिळत नसल्याची ही समस्या प्रत्येक महिन्यात असल्याने एसटी कर्मचाऱ्यांवर उपासमारीची वेळ आली असल्याचे तक्रारीत नमूद करण्यात आले आहे.

दरम्यान आता भंडारा जिल्ह्यातील एसटी कर्मचाऱ्यांनी आक्रमक भुमिका घेत भंडारा एसटी विभागप्रमुख विनय गव्हाळे यांच्याविरोधात भंडारा शहर पोलीस ठाण्यात तक्रार दाखल करून त्यांच्यावर गून्हा दाखल करण्याची मागणी केली आहे. पगारासाठी एसटी कर्मचाऱ्यांनी विभागप्रमुखाच्या विरोधात पोलिसात तक्रार दाखल करण्याची महाराष्ट्रातील ही पहीलीच घटना असावी. आता मात्र विभागप्रमुखावर पोलिस गुन्हा दाखल करतात किंवा नाही याकडे सर्वांचे लक्ष लागले आहे.

Edited By : Krushnarav Sathe