शिवसेनेकडून आदिवासी कार्यकर्त्याला उमेदवारी; शिवसैनिकांकडून जल्‍लोष

नंदुरबार : नंदुरबार शिवसेना जिल्हाप्रमुख आमश्या पाडवी यांचे विधान परिषदेवर उमेदवारी जाहीर झाली. यानंतर शिवसेना (Shiv Sena) कार्यकर्त्यांकडून फटाके फोडून व मिठाई वाटून जल्लोष करण्यात आला. (nandurbar news Shiv Sena vidhan parishad nominates aamshya padavi)

नंदुरबार (Nandurbar) जिल्ह्यातील अक्कलकुवा तालुक्यातील अतिदुर्गम भागातील आदिवासी नेतृत्व शिवसेना नंदुरबार जिल्हा प्रमुख आमश्या पाडवी यांची पक्ष श्रेष्ठींकडून विधान परिषदेवर उमेदवारी जाहीर झाली. याची बातमी कळताच स्थानिक शिवसेना कार्यकर्त्यांनी अक्कलकुवा आणि खापर येथे फटाके फोडून व मिठाई वाटून आमश्या दादा पाडवी आगे बढो हम तुम्हारे साथ है अशा घोषणा देत जल्लोष साजरा केला आहे.

आदिवासी कार्यकर्ता उमेदवार

शिवसेनेने महाराष्ट्राच्या सीमेवरील एका सामान्य आदिवासी कार्यकर्त्याला विधान परिषदेची उमेदवारी दिल्याने आमश्या दादा पाडवी व कार्यकर्त्यांकडून पक्षप्रमुख व मुख्यमंत्री उद्धव ठाकरे यांचे आभार व्यक्त केले जात आहे. आमश्या पाडवी यांची विधान परिषदेची उमेदवारी निश्‍चित झाल्यास जिल्ह्यात शिवसेना आमदाराचे खाते उघडणार आहे. याचा फायदा शिवसेनेला भविष्यात पक्ष मजबुतीसाठी होणार आहे.