Nanded Crime : पती बेपत्ता असल्याची तक्रार;दीड महिन्यानंतर धक्कादायक माहिती आली समोर, प्रियकराच्या मदतीने नदीत जिवंत फेकले

संजय सूर्यवंशी 
नांदेड : नांदेडच्या किनवट येथे पती बेपत्ता असल्याची तक्रार पत्नीने दिली असताना पोलिसांनी केलेल्या तपासात दीड महिन्यानंतर धक्कादायक माहिती समोर आली आहे. यात विवाहबाह्य संबंध असल्याने यात अडसर ठरणाऱ्या पतीला पत्नीनेच प्रियकराच्या मदतीने दारूच्या नशेत असलेल्या पतीला नदीत जिवंत फेकून दिल्याची धक्कादायक माहिती समोर आली आहे. यामुळे खळबळ उडाली आहे. 

नांदेडच्या किनवट येथे घटना उघडकीस आली आहे. किनवटच्या सिंदगी (मो.) येथील मूळ रहिवासी परंतु गोकुंदा येथे वास्तव्यास असलेले विनोद किशन भगत (वय ५१) यांचा संसार सुरू होता. त्याचवेळी त्यांची पत्नी प्रियंका हिचे किनवट शहरातील ब्रोकरचे काम करणाऱ्या शेख रफीक याच्यासोबत अनैतिक संबंध जुळले. पती विनोद भगत याला याबाबत माहिती पडल्यानंतर अनैतिक संबंधात अडथळा ठरत होता. 

प्रियकराच्या मदतीने नदीत जिवंत फेकले 

दरम्यान पत्नी प्रियंका आणि प्रियकर शेख रफीक यांनी संगनमत करून २९ ऑगस्टला रात्रीच्या वेळी दारूच्या नशेत असलेल्या विनोद भगत यास मराठवाडा- विदर्भाला जोडणाऱ्या पैनगंगा नदीवरील खरबी पुलावरून जिवंत फेकून दिले. यानंतर मयताची पत्नी प्रियंका हिने ३ सप्टेंबरला किनवट पोलिस ठाण्यात पती बेपत्ता झाल्याची तक्रार दाखल केली. मात्र मयताच्या बहिणींनी भावाचा घातपात झाल्याचा संशय व्यक्त केला. 

प्रियकराला ताब्यात घेतल्यानंतर झाला उलगडा 

हाच धागा पकडून पोलिसांनी तपास सुरू केला. तपासादरम्यान फिर्यादी असलेल्या पत्नीच्या मोबाइलमधील एका क्रमांकावर वारंवार झालेले कॉल पोलिसांना संशयास्पद वाटले. त्या नंबरच्या व्यक्तीला म्हणजे प्रियकर शेख रफीक यास ताब्यात घेऊन चौकशी केली असता त्याने गुन्ह्याची कबुली दिली आणि खुनाचे रहस्य उघड झाले. याप्रकरणी पोलिसांनी प्रियकर शेख रफिक शेख रशीद आणि पत्नी प्रियंका विनोद भगत या दोघांविरुद्ध गुन्हा दाखल करत त्यांना ताब्यात घेतले आहे.