Nana Patole News: 'सध्या मुख्यमंत्री आहात याचे भान ठेवा', CM शिंदेंच्या व्हिडिओवरुन नाना पटोलेंचे टीकास्त्र!

कराड, ता. ३० मे २०२४

"एकनाथ शिंदेंना नजिकच्या काळात शेतीच करायची आहे. पण सध्या तुम्ही मुख्यमंत्री आहात, याचे भान ठेवा अन् राज्यातील दुष्काळग्रस्त शेतकऱ्यांना भेट द्या' असा टोला काँग्रेसचे प्रदेशाध्यक्ष नाना पटोले यांनी लगावला. कराडमध्ये ते माध्यमांशी बोलत होते.

काय म्हणाले नाना पटोले?

"मुख्यमंत्री सध्या गावी आलेत. तेथून मी शेतात आहे, असं ट्विट करतात. पण राज्यात दुष्काळ आहे. शेतकरी आत्महत्या करीत आहेत. याकडे त्यांनी लक्ष द्यावे. पुन्हा तुम्हाला शेतीच करायची आहे, असा उपरोधिक टोला काँग्रेसचे प्रदेशाध्यक्ष नाना पटोले यांनी लगावला. तसेच जनतेच्या लोकांच्या प्रश्न मांडले, विचारले की सत्तेवर असलेल्यांना स्टंट वाटत आहे. ही बाब चुकीची आहे," असेही ते यावेळी म्हणाले.

"बाबासाहेब आंबेडकर यांचे फोटो फाडले गेले याचे समर्थन कोणीही करणार नाही. पण मनुस्मृती अभ्यासात यावी हा भाजपचा प्रयत्न आहे त्याला काँग्रेस नेहमीच विरोध करेल. अभ्यासक्रमात मनुस्मृती आणून संविधान संपवण्याचा भाजपचा डाव आहे. तो कालबाह्य ग्रंथ आहे," असे महत्वाचे विधानही नाना पटोले यांनी केले.

पुण्यातील पोर्शे अपघातावरुनही नाना पटोले यांनी सत्ताधाऱ्यांवर निशाणा साधला. गरिबांना रस्त्यावर चालण्याचा अधिकार आता राहिलेला नाही. श्रीमंत लोक, मुले पबमध्ये राहतील तेथून गाडीची रेस लावतील गरीबांना चिरडून टाकतील. आम्ही त्यावर बोललो की सत्ताधाऱ्यांना स्टंट वाटतो, असा टोला त्यांनी यावेळी लगावला.