Nagpur Crime : आजीजवळ झोपलेल्या पाच वर्षीय मुलीसोबत घडले भयंकर; आजीच्या सतर्कतेने अनर्थ टळला

पराग ढोबळे 

नागपूर : नागपुरात एक धक्कादायक घटना समोर आली आहे. या घटनेत घरामध्ये आजीजवळ झोपलेली पाच वर्षीय बालिकेला एकाने उचलून नेत अपहरण करण्याचा प्रयत्न केला. चाहूल लागताच आजी उठली असता तिने आरडाओरड केली. यामुळे पुढील अनर्थ टळला असून आजीच्या सतर्कतेमुळे नात सुरक्षित आहे. दरम्यान या प्रकरणी पोलिसात तक्रार दाखल करण्यात आली आहे.  

नागपूर शहरातील मानकापूर पोलीस स्टेशनच्य हद्दीत २७ जुनच्या पहाटे हि घटना घडली आहे. या घटनेमुळे परिसरात भीतीचे वातावरण निर्माण झाले आहे. घटेनच्या दिवशी ४ वर्ष ११ महिन्याची बालिका आजीसोबत घरात झोपलेली होती. दरवाजा बंद असतानाही संशयित आरोपी श्रवणकुमार याने शिताफीने घराच्या आत प्रवेश केला. त्यानंतर आजीजवळ झोपलेली थेट मुलीपर्यंत पोहचला.

आजीच्या सतर्कतेने बालिका सुरक्षित  

या चिमुकलीला उचलून घेऊन जाऊ लागला. दरम्यान घरात काही तरी चाहुल लागल्याने आजी अचानक जाग आली. तिने पहिले असता जवळ झोपलेली नात जवळ नसल्याचे पहिले असताना आरोपी नातीला उचलून नेत असल्याचे दिसला. हे पाहुन आजीने जोरात आरडाओरड सुरू केला. यामुळे आपण पकडले जाऊ या भीतीने आरोपीने घाबरून बालिकेस घरातच सोडून पळून गेला.

५५ सिसिटीव्ही तपासत संशयित ताब्यात 

दरम्यान आजीच्या तक्रारीवरून मानकापूर पोलीस ठाण्यात अपहरणाच्या उद्देशाने घरात घुसखोरी केल्याचा गुन्हा दाखल केला. यानंतर मानकापूर पोलिसांनी तत्काळ परिसरातील ५५ सीसीटीव्ही फुटेज तपासले. यातून आरोपीची ओळख पटवली आणि सापळा रचून आरोपी श्रवणकुमार शिवराम यादव याला बेड्या ठोकल्या आहे. तर आरोपीने पोलीस चौकशीत गुन्हा कबुल केला आहे.