गरिबांची मुलगी गेली तर पळाली,श्रीमंतांची गेली तर 'लव्ह मॅरेज'; बच्चू कडू विरोधकांवर कडाडले

अमर घटारे

Bacchu kadu News : अमरावतीत आज आमदार बच्चू कडू यानी प्रहार संघटनेच्या मेळाव्यात जोरदार शक्तीप्रदर्शन केलं. आमदार रवी राणा यांच्यासबोत झालेल्या वादासंदर्भात आमदार बच्चू कडू यांनी आज भूमिका स्पष्ट केली. यावेळी बच्चू कडू यांनी विरोधकांचा खरपूस समाचार घेतला. 'गरिबांची मुलगी गेली तर पळाली,श्रीमंतांची गेली तर लव्ह मॅरेज', अशा शब्दात बच्चू कडू बंडखोर आमदारांवर टीका करणाऱ्या विरोधकांवर जोरदार टीका केली.

रवी राणा यांनी आपले शब्द मागे घेतल्यानंतर बच्चू कडू (Bachhu Kadu) यांनीही नरमाईची भूमिका घेतली. मात्र प्रहारच्या मेळाव्यात आमदार बच्चू कडू यांनी आपल्या स्टाईलमध्ये त्यांच्या विरोधकांना इशारा झाला. आम्ही कुणाच्या वाटेला जात नाही, पण आमच्या मागे कोण लागलं तर त्यांना सोडत नाही, असं बच्चू कडू यांनी म्हटलं.

'प्रहार आंडूपांडूचा पक्ष नाही. आम्ही रक्ताचं पाणी केलं ते राजकारणासाठी नाही केलं. दिव्यांगासाठी आम्ही काम केलं. एकानेही त्यांच्यासाठी विधानसभेत आवाज उठवला नाही. ते काम आम्ही केलं. आम्ही उगाच गुवाहाटीला गेलो नाही. मंत्री होतोच की, मग शिंदे (Eknath Shinde) गटासोबत जाण्याची गरज काय होती. परंतु सत्ता वंचित घटकापर्यंत पोहोचवण्यासाठी सत्तेसोबत जावं लागलं, असं बच्चू कडू यांनी म्हटलं.

आमदार रवी राणा यांनी गुवाहाटीला जाण्यासाठी पैसे घेतल्याच्या आरोपांवर बोलताना बच्चू कडू यांनी म्हटलं की, राणा यांची पहिली वेळ आहे म्हणून त्यांना माफ करतो. मात्र पुन्हा आमच्या वाट्याला गेलं तर काही खैर नाही, असा इशारा देखील बच्चू कडून यांनी दिला.