Melghat Fire: मेळघाटातील चाकर्दामधील वस्तीला भीषण आग; संपूर्ण वस्ती जळून खाक

अमर घटारे, साम प्रतिनिधी

धारणी तालुक्यातील नागढाना येथील नवी वस्ती चाकर्दा येथे काल रात्री 9 च्या सुमारास भीषण आगीची दुर्घटना घडली. या अचानक लागलेल्या आगीत एका रांगेत असलेल्या 7 पेक्षा जास्त घरे पूर्णतः जळून खाक झाली आहेत. तर अन्य 2 घरांचेही मोठे नुकसान झाले आहे. आग एवढी भयावह होती की काही क्षणातच संपूर्ण वस्ती आगीच्या विळख्यात आली. अनेक नागरिक घरात नसल्याने जीवितहानी टळली असली तरी त्यांचा संपूर्ण संसार उद्ध्वस्त झालाय.

या भीषण आगीत घरातील दुचाकी, गॅस सिलेंडर, कपाटातील दागिने, कपडे, जीवनावश्यक वस्तू, अन्नधान्य आणि शेतातून आणलेली तूरही भस्मसात झाली. सततच्या कष्टाने उभारलेली घरे एका रात्रीत संपून गेली, त्यामुळे अनेक कुटुंबे रस्त्यावर आली आहे. स्थानिक प्रशासन आणि गृहनिर्माण विभागाने त्वरित मदत जाहीर करावी अशी नागरिकांची मागणी आहे.