Manoj Jarange Patil Health : मनोज जरांगेंची प्रकृती खालावली, वजन घटले; डॉक्टरांनी सांगितली नेमकी कारणे

Manoj Jarange Patil Health Update :

मराठा आरक्षणासाठी उपोषणाचं हत्यार उपसणारे मनोज जरांगे पाटील यांच्या प्रकृतीबाबत चिंता वाढवणारी माहिती समोर आली आहे. नऊ दिवस उपोषण केल्यानं जरांगेंची प्रकृती खालावली आहे. त्यांचे जवळपास १२ किलो वजन घटले आहे. त्यांच्या प्रकृतीत सुधारणा होण्यासाठी पुढील दहा ते बारा दिवस त्यांना रुग्णालयात उपचार घ्यावे लागतील, अशी माहिती डॉक्टरांनी दिली.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

मराठा समाजाला आरक्षण मिळावं म्हणून मनोज जरांगे पाटील (Manoj Jarange Patil) यांनी उपोषणासारखे हत्यार उपसले होते. सप्टेंबरमध्ये ते जवळपास १७ दिवस उपोषणाला बसले होते. सरकारच्या शिष्टमंडळानं त्यांची आंतरवाली सराटीमध्ये भेट घेऊन मुदत मागितली होती. त्यानंतर जरांगेंचे महाराष्ट्रातील अनेक ठिकाणी सभा झाल्या.

सरकारला दिलेली मुदत उलटून गेल्यानंतर सव्वा महिन्यातच ते दुसऱ्यांदा उपोषणाला बसले. हे उपोषण जवळपास ९ दिवस सुरू होते. अखेर सरकारच्या आश्वासनानंतर मनोज जरांगे यांनी उपोषण मागे घेतले. ९ दिवस उपोषणाला बसलेल्या मनोज जरांगेंची प्रकृती खालावली आहे.

जरांगेंची प्रकृती खालावल्याचे डॉक्टरांनी सांगितले. त्यांची किडनी आणि लिव्हरला सूज आल्याचेही सांगितले. त्यांचे वजन १२ किलोंनी घटले आहे. काही दिवस त्यांनी पाणी न प्यायल्याने प्रकृती खालावली आहे, असेही डॉक्टरांकडून सांगण्यात आले.

डॉक्टरांनी काय सांगितलं?

मनोज जरांगे पाटील सप्टेंबरमध्ये उपोषणाला बसले होते. उपोषण सोडल्यानंतर पुरेशी विश्रांती न घेतल्यानं त्यांनी राज्यभर दौरे केले. अनेक ठिकाणी सभा घेतल्या.

त्यानंतर काहीच दिवसांनी जरांगे दुसऱ्यांदा उपोषणाला बसले. पाणीही न प्यायल्याने त्यांचे वजन घटले आहे. काल, शुक्रवारी दुपारी त्यांना उलट्यांचा त्रास जाणवू लागला. त्यांच्या प्रकृतीत सुधारणा होण्यासाठी दहा ते बारा दिवस उपचारासाठी रुग्णालयात राहावे लागणार आहे, अशी माहिती डॉक्टरांनी दिली.

Edited by - Nandkumar Joshi