Maharashtra Politics: सर्वात मोठी बातमी; राहुल नार्वेकरांच्या निकालाविरोधात ठाकरे गट सुप्रीम कोर्टात

प्रमोद जगताप, दिल्ली|ता. १५ जानेवारी २०२४

Shivsena MLA Disqualification Case:

शिवसेना आमदार अपात्रतेचा निकाल लागल्यानंतर राज्याचे राजकीय वातावरण चांगलेच तापले आहे. विधानसभा अध्यक्ष राहुल नार्वेकर यांनी दिलेल्या निकालावरुन ठाकरे गट आक्रमक झाल्याचे पाहायला मिळत आहे. अशातच या प्रकरणी आता सर्वात मोठी अपडेट समोर आली असून आमदार अपात्रतेच्या निकालाविरोधात ठाकरे गटाने सुप्रीम कोर्टात धाव घेतली आहे.

याबाबत सविस्तर माहिती अशी की, १० जानेवारी रोजी महाराष्ट्राच्या राजकारणाला कलाटणी देणारा शिवसेना आमदार अपात्रतेचा निकाल लागला. विधानसभा अध्यक्ष राहुल नार्वेकर (Rahul Narvekar) यांनी उद्धव ठाकरेंना धक्का देत एकनाथ शिंदेंच्या बाजुने निकाल दिला. एकनाथ शिंदेंसोबत (Eknath Shinde) असलेला गट म्हणजेच खरी शिवसेना असे या निकालामधून स्पष्ट झाले.

मात्र या निकालानंतर ठाकरे गटाने राहुल नार्वेकरांविरोधात संताप व्यक्त केला होता. राहुल नार्वेकर यांनी सुप्रीम कोर्टाच्या निर्देशाविरोधात निकाल दिला असल्याचा आरोप ठाकरे गटाकडून होत आहे. त्यामुळेच आता ठाकरे गटाने या प्रकरणी सुप्रीम कोर्टात धाव घेतली आहे.

 ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

आमदार अपात्रतेच्या निकालाविरोधात ठाकरे गटाने आज सुप्रीम कोर्टात ऑनलाईन याचिका दाखल केली आहे. अध्यक्षांनी दिलेल्या निकालामुळे सुप्रीम कोर्टाचा (Supreme Court) अवमान झाला असल्याचे ठाकरे गटाने या याचिकेत म्हटले आहे. याप्रकरणी आता सुप्रीम कोर्ट काय निर्णय घेणार? हे पाहणे महत्वाचे ठरणार आहे. (Latest Marathi News)