Ladki Bahin Yojana: लाडकी बहीण योजनेत १६५ कोटींचा घोटाळा; १२ हजार पुरुष लाभार्थी; पैसे वसूल करणार

लाडकी बहीण योजनेतील लाभार्थी महिला नोव्हेंबरच्या हप्त्याची वाट पाहत आहेत. दरम्यान, त्याआधीच लाडकी बहीण योजनेत फसवणूक झाल्याची धक्कादायक माहिती समोर आली आहे. जवळपास हजारो अपात्र लाभार्थ्यांनी योजनेचा लाभ घेतला आहे. या लाभार्थ्यांनी सरकारचे कोट्यवधी रुपये लाटले आहे.

अपात्र लाभार्थ्यांनी सरकारने १६५ कोटी लाटले

लाडकी बहीण योजनेत तब्बल १६५ कोटी रुपये अपात्र लाभार्थ्यांना वाटले गेल्याची धक्कादायक माहिती समोर आली आहे. महिला आणि बालविकास मंत्री अदिती तटकरे यांनी विधानसभेत दिलेल्या लेखी उत्तरात ही कबुली दिली आहे. या योजनेत १२,४३१ पुरुषांनी तर ७७,००० अपात्र महिलांनी योजनेचा लाभ घेतला आहे. पुरुषांनी २५ कोटी रुपये तर अपात्र महिलांनी १४० कोटी रुपये लाटल्याचे उघड झाले आहे.

शासकीय कर्मचाऱ्यांकडून वसुली सुरु

लाडकी बहीण योजनेत ९,५२६ शासकीय महिला कर्मचाऱ्यांनीही या योजनेचा लाभ घेतल्याचे समोर आले आहे. शासनाकडून आता या पैशांची वसुली आणि रितसर कारवाई सुरू करण्यात आली आहे. आता ज्या सरकारी कर्मचाऱ्यांनी पैसे घेतले आहेत. त्यांच्याकडून आता वसूली केली जाणार आहे.

लाडकीला २१०० कधी मिळणार? (Ladki Bahin Yojana 2100 Rupees Installment)

लाडकी बहीण योजनेत लाडक्या बहिणींना २१०० रुपये देण्याचे आश्वासन दिले होते. अजूनही महिलांना २१०० रुपये देण्यात आले नाहीत, असा प्रश्न विरोधकांनी विचारला होता. त्यावर एकनाथ शिंदे यांनी उत्तर दिले आहे. योग्य वेळ आल्यावर महिलांना पैसे दिले जातील, असं त्यांनी सांगितलं आहे. त्यामुळे महिला आता २१०० रुपयांची वाट पाहत आहेत.