Kalyan News : कल्याण पूर्वेतील प्रस्तावित घनकचरा प्रकल्पाला विरोध; रस्त्यावर उतरत नागरिकांची घोषणाबाजी

अभिजित देशमुख 
कल्याण : कल्याण पूर्वेतील १०० फुट रोड परिसरात महानगरपालिकेच्या घनकचरा प्रकल्प प्रस्तावित आहे. या घनकचरा प्रकल्पाविरोधात स्थानिक रहिवाशांचा विरोध असून तीव्र आंदोलन सुरू केले आहे. हा कचरा प्रकल्प मानवी वस्त्यांपासून दूर हलवावा; अशी मागणी करत शेकडो रहिवासी रस्त्यावर उतरत स्वाक्षरी मोहीम आणि घोषणाबाजी करत आंदोलन केले.

कल्याण पूर्वेतील १०० फुट रोड परिसरात महानगरपालिका घनकचरा प्रकल्प प्रस्तावित आहे. तथापि, स्थानिक रहिवाशांनी या प्रकल्पाला तीव्र विरोध दर्शविला आहे. सदरचा प्रकल्प मानवी वस्त्यांच्या जवळ असल्यामुळे त्याचा त्रास परिसरातील नागरिकांना होणार आहे. प्रामुख्याने आरोग्य आणि पर्यावरणावर याचा परिणाम होऊ शकतो. यामुळे येथील स्थानिक नागरिकांनी या प्रकल्पाला विरोध दर्शविला आहे. 

वस्त्यांपासून दूर हलविण्याची मागणी 

कचरा प्रकल्पाचा विरोध दर्शवत नागरिकांनी स्थानिक आमदार सुलभा गायकवाड यांची भेट घेत प्रश्न मांडला. यानंतर त्यांच्या नेतृत्वाखाली पालिका अधिकाऱ्यासोबत बैठक झाली. यावेळी रहिवाश्यांनी या प्रकल्पामुळे शेकडो कुटुंबांना नाहक त्रास होणार असल्याने हा प्रकल्प मानवी वस्त्यांपासून दूर हलवण्याची मागणी केली.   

स्वाक्षरी मोहीम राबवत दर्शविला विरोध 

सदरचा प्रकल्प उभारणीच्या विरोधात आंदोलन करण्यात आले. आंदोलनाच्या सुरुवातीला छत्रपती शिवाजी महाराज चौकात शेकडो रहिवाशांनी एकत्र येऊन स्वाक्षरी मोहीम राबवली आणि घोषणाबाजी केली. तसेच जोपर्यंत आमच्या मागण्या पूर्ण होत नाही, तोपर्यंत हे आंदोलन सुरूच ठेवण्याचा निर्धार यावेळी रहिवाशांनी केला आहे.