मराठवाड्यातील नागरिकांसाठी अतिशय मोठी आणि महत्वाची बातमी समोर आली आहे. सप्टेंबर महिन्यातही पावसाची संततधार सुरु असल्याने जायकवाडी धरणाच्या पाणीसाठ्यात झपाट्याने वाढ झाली आहे. लवकरच धरण 100 टक्के भरण्याची शक्यता आहे. त्यामुळे कोणत्याही क्षणी धरणातून गोदावरी नदीपात्रात पाण्याचा विसर्ग केला जाऊ शकतो. खबरदारीचा उपाय म्हणून नदीकाठच्या गावांना सतर्कतेचा इशारा देण्यात आलाय.
गेल्या दोन ते तीन दिवसांपासून मराठवाड्यासह छत्रपती संभाजीनगर (Chhatrapati Sambhajinagar) जिल्ह्यात मुसळधार पाऊस कोसळत आहे. अनेक तालुक्यांना पावसाने चांगलंच झोडपून काढलं असून ओढे, नदी-नाले आता ओसंडून वाहत आहेत. जिल्ह्यातील मध्यम आणि छोटे प्रकल्प आता पूर्णतः भरलेली आहेत.सोबतच जायकवाडी धरणाचा पाणीसाठा आज मंगळवार सकाळी 90 टक्क्यांच्या वर पोहोचला आहे.
सध्या धरणात 11 हजार क्युसेक इतक्या पाण्याची आवक सुरू आहे. ही आवक वाढली आणि पाणीसाठा 95 टक्क्यांच्या पुढे गेला तर जायकवाडी धरणाचे (Jayakwadi Dam) काही दरवाजे उघडून गोदापात्रात पाण्याचा विसर्ग केला जाणार आहे. छत्रपती संभाजीनगर जिल्ह्यात आजही पावसाची अंदाज आहे. सकाळपासून ढगाळ वातावरण तयार झालं असून काही ठिकाणी हलका पाऊसही झालाय.
त्यामुळे लवकरच जायकवाडी धरण 100 टक्के भरण्याची शक्यता आहे. हीच बाब लक्षात घेत प्रशासनाने गोदावरी नदीकाठच्या गावांना सतर्कचा इशारा दिला आहे. दुसरीकडे सलग दोन दिवसांपासून सुरू असलेल्या जोरदार पावसामुळे खरीप हंगामातील कापूस, बाजरी, मका या पिकांचे मोठे नुकसान झालं आहे.
काही ठिकाणी जमिनी खरडून गेल्याने पिके वाहून गेली आहे. तर काही ठिकाणी पिके आडवी झाले आहेत. अनेक ठिकाणी शेतीमध्ये पाणी थांबल्यामुळे पिक वाढतील की नाही अशी भीती शेतकऱ्यांना आहे. सरकारने तातडीने नुकसानीची पाहणी करून पंचनामे करावेत. तसेच आर्थिक मदत जाहीर करावी, अशी मागणी शेतकऱ्यांकडून केली जात आहे.
Edited by - Satish Daud
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.