Hingoli Heavy Rain : हिंगोली जिल्ह्यात पुन्हा पावसाचा हाहाकार; राज्य मार्गावर पाणी साचल्याने वाहतूक बंद

हिंगोली : हिंगोली जिल्ह्यात आठ दिवसांच्या विश्रांतीनंतर पुन्हा पावसाचे आगमन झाले असून रात्रीपासून मुसळधार पाऊस होत आहे. या पावसामुळे हिंगोली ते संभाजीनगर रस्त्याचे काम सुरू असलेल्या राज्य मार्गावर पाणी साचले असल्याने मागील तीन तासांपासून वाहतूक व्यवस्था बंद झाली आहे. शिवाय शेतात देखील पाणी साचल्याने २५ हेक्‍टरपेक्षा जास्त शेतीचे देखील नुकसान झाले आहे.

हिंगोली (Hingoli) जिल्ह्यात मुसळधार पाऊस कोसळत आहे. आठ दिवसाच्या विश्रांतीनंतर मध्यरात्री सलग चार तास कोसळलेल्या या पावसामुळे (Heavy Rain) अनेक भागातील ओढे व नाल्यांना पूर आला आहे. तर औंढा- जिंतूर राज्य मार्गावर रस्त्याचे काम सुरू असलेल्या परिसरात मोठ्या प्रमाणात पाणी साचल्याने मागील तीन तासांपासून हिंगोली संभाजीनगर राज्य महामार्गावरील वाहतूक व्यवस्था पूर्णतः बंद करण्यात आली आहे. यामुळे वाहन धारकांच्या मोठ्या प्रमाणात रांगा लागल्या आहेत. पाणी ओसरल्यानंतरच वाहतूक सुरळीत होणार असल्याचे सांगण्यात येत आहे. 

शेतातील पिके पाण्याखाली 

दरम्यान या राज्य मार्गाचे काम करणाऱ्या कंत्राटदाराच्या चुकीमुळे या परिसरातील ३० हेक्‍टरपेक्षा जास्त शेतीमधील हळद, कापूस, सोयाबीन या पिकांचे देखील रस्त्यावरील पाणी शेतात घुसल्याने नुकसान झाले आहे. दरम्यान या मार्गावरील वाहतूक व्यवस्था बंद असल्याने राज्य मार्ग प्रशासनाने कंत्राटदाराला तातडीने सूचना देत वाहतुकीसाठी हा मार्ग मोकळा करायला सुरुवात केली आहे.