FDA ची तुळजापुरात खाद्यपदार्थ विक्रेत्यांवर धडक कारवाई, 9 व्यावसायिकांना शटर डाऊनचा आदेश

- बालाजी सुरवसे

Tuljapur News : महाराष्ट्राची कुलस्वामिनी आई तुळजाभवानी देवीचा शारदीय नवरात्र उत्सवास ( Tuljapur Shardiya Navratri 2023) माेठ्या उत्साहात प्रारंभ झाला आहे. लाखाे भाविक तुळजापूरात देवीच्या दर्शनासाठी येत आहेत. भाविकांच्या आराेग्याची काळजी घेण्यासाठी अन्न व औषध प्रशासन विभाग (FDA) सतर्क आहे. एफडीएने मिठाईसह खाद्य पदार्थ विक्रीच्या दुकानांची तुळजापूरात तपासणी मोहीम सुरु केली आहे. (Maharashtra News)

शारदीय नवरात्रानिमित्त तुळजापूर येथे अन्न व औषध प्रशासन विभाग ॲक्शन मोडवर आला आहे. तुळजापूर शहरात अन्न व औषध प्रशासन विभागाकडून धडक कारवायांचे सत्र राबवल जात आहे. हॉटेल, स्वीट होम, नमकीन, फराळ, पेढे निर्माते व विक्रेते यांच्या दुकानांच्या तपासण्या सुरु आहेत.

या तपासण्यांनंतर विनापरवाना व्यवसाय करणाऱ्या 9 व्यावसायिकांना व्यवसाय बंद करण्याच्या सूचना केल्याची माहिती अन्न व औषध प्रशासन विभागाच्या अधिका-यांनी दिली. तसेच अस्वछ जागी ठेवलेला पेढा नष्ट करून चार नमुने विश्लेषणासाठी घेण्यात आले आहेत.

आगामी काळात देखील अन्न व औषध प्रशासन विभागाकडून अशाच कारवाया करण्यात येणार असल्याची माहिती सहाय्यक आयुक्त शिवकुमार कोडगिरे यांनी साम टीव्हीशी बाेलताना दिली. या कारवायांमुळे नियमांचे उल्लंघन करणाऱ्या विक्रेता व निर्मात्यांचे धाबे दणाणले आहेत.

Edited By : Siddharth Latkar