Pandharpur Khillar Bazar: माघी यात्रेच्या खिलार जनावर बाजारावर दुष्काळाचे सावट; जनावरांची मागणी घटली

भारत नागने, पंढरपूर

Pandharpur Maghi Khillar Bail Bazar:

पंढरपूर येथील प्रसिद्ध असलेल्या माघी खिलार जनावरांच्या बाजारावर यंदा दुष्काळाचे सावट निर्माण झालंय. जनावरांना मागणी कमी असल्याने खिलार बैल व खोंडांचे भाव निम्म्यावर आले आहेत. माघी यात्रेच्या निमित्ताने वाखरी येथे खिलार जनावरांचा बाजार भरलाय. बाजारात राज्याच्या विविध भागातून मोठ्या संख्येने खिलार बैल, खोंड आदींसह इतर जनावरे विक्रीसाठी दाखल झाली आहेत. (Latest News)

हजारो जनावरे पंढरीनगरीत दाखल झाली आहेत. येथील वाखरी पालखी तळावर हा बाजार भरलाय. यामध्ये खिलार जनावरे, पंढरपुरी म्हैस, जर्सी जनावरांचा समावेश आहे. दरम्यान यंदा राज्यभरात दुष्काळाचे सावट असल्याने चारा आणि पाण्याची तीव्र टंचाई निर्माण झाली आहे. त्यामुळे यंदाच्या बाजारात मोठ्या संख्येने जनावरे विक्रीसाठी आली आहेत.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

खिलार जनावरांच्या खरेदी - विक्रीसाठी येथील बाजार राज्यात प्रसिद्ध आहे. येथील बाजारात मराठवाड्यासह कर्नाटकातून देखील मोठ्या संख्येने खिलार जनावरे विक्रीसाठी आली आहेत. सध्या बाजारात जवळपास पाच हजाराहून अधिक जनावरे विक्रीसाठी दाखल झाली आहेत.

दोन दिवसांमध्ये फक्त १० ते १५ टक्के जनावरांची खरेदी- विक्री झालीय. मागणी कमी असल्याने जनावरांचे दर देखील घसरले आहेत. एक लाख रुपये किमतीच्या बैलाला ५० हजार रुपयांना मागणी होत आहे. तर खोंडांच्याही किंमती ही निम्याने खाली आल्या आहेत. किंमती कमी झाल्याने पशू पालक शेतकरी अडचणीत आले आहेत.