धुळ्यातही महसूल कर्मचारी बेमुदत संपावर

धुळे : महसूल कर्मचाऱ्यांच्या गेल्या कित्येक वर्षांपासून प्रलंबित असलेल्या मागण्यांकडे राज्य शासनातर्फे सतत दुर्लक्ष केले जात आहे. असा आरोप लावत राज्य शासनाच्या या दुर्लक्षितपणाचा निषेध करण्यासाठी महसूल विभागाच्या धुळे जिल्हा महसूल कर्मचारी संघटनेतर्फे आजपासून बेमुदत संप पुकारण्यात आला आहे. (dhule news Revenue workers on indefinite strike in Dhule district)

महसूल विभागामध्ये गेल्या कित्येक वर्षांपासून भरती प्रक्रिया राबवली गेले नाही. त्यामुळे रिक्त असलेली पदे भरली न गेल्यामुळे इतर कर्मचाऱ्यांवर अतिरिक्त कामाचा बोजा पडला असल्यामुळे या कर्मचाऱ्यांना नाहक त्रास सहन करावा लागत आहे. त्यामुळे रिक्त असलेली पदे लवकरात लवकर भरण्यात यावी; या प्रमुख मागणीसह आणखी इतर प्रलंबित मागण्यांच्या संदर्भात राज्य शासनाचे लक्ष वेधण्यासाठी महसूल कर्मचाऱ्यांनी आजपासून बेमुदत संप पुकारला आहे.

घोषणाबाजी करत निषेध

धुळे जिल्हाधिकारी परिसरात असलेल्या क्युमाईन क्लब या ठिकाणी या कर्मचाऱ्यांनी संपाला सुरुवात केली असून, राज्य शासनाच्या दुर्लक्षितपणा विरोधामध्ये या कर्मचाऱ्यांनी घोषणाबाजी करून आपला निषेध व्यक्त केला आहे.