MLA car accident : बुलढाण्यात आमदाराच्या कारचा भीषण अपघात, २५ वर्षाचा तरूण कोमात

संजय जाधव, साम टीव्ही, प्रतिनिधी

MLA Kiran Sarnayak car accident news update : बुलढाणामधील चिखली शहरात शिक्षक मतदारसंघचे आमदार किरण सरनाईक यांच्या कारला भीषण अपघात झाला आहे. या अपघातात २५ वर्षीय कृष्णा लष्कर हा युवक गंभीर जखमी झाला असून, तो कोमात गेला आहे. चिखली शहरातील ही घटना असून परिसरात खळबळ उडाली आहे. या अपघातामध्ये किरण सरनाईक यांना दुखापत झाली की नाही, याबाबत अद्याप कोणतीही माहिती समोर आलेली नाही.

आमदार सरनाईक हे आमदार शिंगणे यांच्याकडे सांत्वन भेटीसाठी आले होते, त्यावेळी हा अपघात झाला. या अपघातामुळे परिसरात खळबळ उडाली आहे. जखमी युवकावर तातडीने रुग्णालयात उपचार सुरू आहेत. त्याची प्रकृती चिंताजनक आहे. पोलिसांनी घटनास्थळी भेट देऊन तपास सुरू केला आहे. अपघाताच्या कारणांचा शोध घेतला जात असून, याबाबत अधिक माहिती लवकरच समोर येण्याची शक्यता आहे.

मिळालेल्या माहितीनुसार, अमरावती विभागाचे शिक्षक आमदार किरण सरनाईक (रा. वाशीम) यांची कार पायी चालत जाणाऱ्या कृष्णा नंदू लष्कर (वय २५, राहणार गौरक्षण वाडी चिखली) या तरुणास पानगोळे हॉस्पिटलसमोर उडवले. सकाळी दहाच्या सुमारास घडलेल्या भीषण अपघातामध्ये कृष्णा गंभीर जखमी झाला. त्याला तातडीने जवंजाळ हॉस्पिटल, चिखली येथे उपचारासाठी दाखल करण्यात आले आहे. कृष्णा सध्या कोमात आहे.

घटनेच्या वेळी आमदार किरण सरनाईक हे बुलढाण्यातील डॉ. राजेंद्र शिंगणे यांच्या निवासस्थानी सांत्वनपर भेटीसाठी जात होते. घटनेनंतर आमदार सरनाईक यांनी स्वतः जखमी तरुणाला कारमध्ये बसवून जवंजाळ हॉस्पिटल येथे दाखल केले. या घटनेमुळे परिसरात संतापाची लाट उसळली आहे. या प्रकरणी पोलिसांनी तात्काळ घटनास्थळी धाव घेतली. त्यांनी चालकाला ताब्यात घेऊन रस्त्यावरील अपघातग्रस्त कारचा पंचनामा केला आहे. कार चिखली पोलीस स्टेशनला जप्त करण्यात आली आहे.