Corona Virus : अकोल्यात कोरोनाचा शिरकाव; शहरात आढळले दोन रुग्ण

अक्षय गवळी 

अकोला : राज्यात कोरोना रुग्णांची संख्या झपाट्याने वाढत असल्याचे चित्र आहे. यामुळे आरोग्य यंत्रणा सतर्क झाली आहे. दरम्यान अकोला शहरात देखील कोरोनाचा शिरकाव झाला असून अकोला महापालिका क्षेत्रात कोरोनाचे दोन रुग्ण आढळून आले आहे. या दोन्ही रुग्णांवर घरीच उपचार सुरु आहेत. दरम्यान महापालिकेची आरोग्य यंत्रणा सतर्क झाली आहे. 

राज्यात पुन्हा कोरोनाचा प्रादुर्भाव वाढत आहे. मुंबई, पुणे, संभाजीनगर, सोलापूर पाठोपाठ आता विदर्भातही कोरोनाचा शिरकाव झाला आहे. कोरोनाचा हा नवीन व्हेरिएंट अधिक घातक नसला तरी नागरिकांनी सतर्क राहण्याचे आवाहन करण्यात येत आहे. दरम्यान राज्यात रोज नवीन रुग्णांच्या संख्येत वाढ होताना दिसून येत आहे. दररोज वेगवेगळ्या ठिकाणी रुग्ण आढळून येत असल्याने राज्याची आरोग्य यंत्रणेकडून सतर्क राहण्याचे आवाहन करण्यात येत आहे. 

अकोल्यात शिरकाव 

अकोला शहरात अर्थातच अकोला महापालिका क्षेत्रात कोरोनाचा शिरकाव झाल्याचे पाहण्यास मिळत आहे. शहरात दोन कोरोनाचे रुग्ण आढळून आले आहेत. या दोन्ही रुग्णाची प्रकृती चांगली असून त्यांच्यावर घरीच उपचार सुरु असून त्यांना घरीच क्वारंटाईन करण्यात आल्याची माहिती अकोला शासकीय महाविद्यालयाचे अधिष्ठाता मीनाक्षी गजबीये यांनी दिली आहे. 

काळजी घेण्याचे आवाहन 

दरम्यान अकोल्यातही कोरोना रिटर्न होतांना दिसून आला. त्यामुळे अकोल्यातील आरोग्य यंत्रणा अलर्ट मोडवर आली आहे. शासकीय रुग्णालयात कोरोनाच्या अनुषंगाने स्वतंत्र व्यवस्था करण्यात आली आहे. तर कोरोनाचे रुग्ण आढळून आल्याने अकोलकरांनी घाबरून न जाता स्वतःची काळजी घ्यावी, असे आवाहन आरोग्य विभागाने केले आहे.