Priya Bapat: नाट्यगृहाची परिस्थिती पाहून प्रिया बापट संतापली, नाट्यरसिकांचीच केली कानउघडणी

Priya Bapat Angry On Audience

गेल्या काही दिवसांपूर्वी नाट्यगृहातील अनेक प्रश्न ऐरणीवर आले होते. नाट्यगृहातील साफसफाई, तेथील व्यवस्थेसह अनेक मुद्दे त्यावेळी उपस्थित झाले होते. अशातच पुन्हा एकदा नाटकातील साफसफाईवर प्रश्न उपस्थित झाला आहे. जितका प्रतिसाद मराठी चित्रपटांना मिळतो, तितकाच प्रतिसाद मराठी नाटकांनाही मिळताना दिसत आहे. नुकताच प्रिया बापट आणि उमेश कामतच्या 'जर तरची गोष्ट' या नाटकाचा पुण्यामध्ये शो होता. नाट्यगृहातील परिस्थिती पाहून प्रिया बापट 'काही अंशी प्रेक्षक देखील जबाबदार आहेत,' असं म्हणत ती प्रेक्षकांवर संतापली आहे.

सध्या प्रिया बापट आणि उमेश कामत हे दोघेही 'जर तरची गोष्ट' या नाटकाच्या शोमुळे बरेच व्यग्र आहे. नुकताच त्यांच्या नाटकाचा पुण्यातील यशवंतराव चव्हाण नाट्यगृहामध्ये शो होता. यावेळी नाट्यगृहामध्ये प्रेक्षकांनी केलेला कचरा पाहून ती चांगलीच संतापली आहे. तिने हा फोटो इन्स्टा स्टोरीवर शेअर करत लिहिले की, ‘नाट्यगृह स्वच्छ ठेवणे ही प्रेक्षकांचीही जबाबदारी आहे. कचरा कचरापेटीत टाकावा, नाट्यगृहात नाही. ही साधी गोष्ट आपल्याला कधी कळणार?’ असं म्हणून तिने आपला संताप व्यक्त केला आहे.

या शेअर केलेल्या फोटोमध्ये, नाट्यगृहात प्रेक्षकांनी केलेला कचरा पाहायला मिळतोय. फोटोमध्ये पाण्याच्या बाटल्या, खाऊची पाकिटं, चहाचे कप आणि इतर कचरा पाहायला मिळत आहे.

प्रेक्षकांनी केलेला हा कचरा पाहून प्रिया बापट चांगलीच संतापली आहे. तिने या सगळ्यासाठी प्रेक्षकांनाच जबाबदार ठरवले आहे. नाटक पाहायला येणाऱ्या नाट्य रसिकांचं हे वागणं बरोबर आहे का?, असा प्रश्न तिने उपस्थित केलाय.

अद्वैत दादरकर, रणजित पाटील दिग्दर्शित, इरावती कर्णिक लिखित या नाटकात प्रिया बापट, उमेश कामत यांच्यासह पल्लवी अजय, आशुतोष गोखले यांच्याही प्रमुख भूमिका आहेत तर नंदू कदम या नाटकाचे निर्माते आहेत.