Latur News: घरची गरिबी, मुलांना इंग्रजी शाळेत शिक्षण घेता येईना, ५ वर्षांच्या चिमुकलीसह आईने आयुष्य संपवलं; लातूर हळहळलं!

संदिप भोसले| लातूर, ता. २० जून २०२४

मुलीला इंग्रजी शाळेत शिक्षण घेता येत नसल्याने आईने पाच वर्षांच्या चिमुकलीसह विहिरीत उडी घेऊन जीवन संपवल्याची धक्कादायक अन् मन सुन्न करणारी घटना लातूर जिल्ह्यात घडली. लातूर जिल्ह्यातील निलंगा तालुक्यात घडलेल्या या घटनेने सर्वत्र हळहळ व्यक्त होत आहे.

याबाबत सविस्तर माहिती अशी की, लातूर जिल्ह्यातल्या निलंगा तालुक्यातील माळेगाव (कल्याणी) येथे एका विहिरीत माय-लेकीचा मृतदेह आढळून आल्याने एकच खळबळ उडाली आहे. भाग्यश्री व्यंकट हालसे वय( 26 )आणि समीक्षा व्यंकट हालसे वय (5) असे मृत आई आणि मुलीचे नाव आहे.

सीबीसी शाळेत आपल्या मुलांना शिक्षण घेता येत नसल्याने या नैराश्यातून आईने आपल्या पाच वर्षाच्या चिमुकलीसोबत विहिरीत उडी घेत जीवन यात्रा संपवल्याचे सांगण्यात येत आहे. आता याप्रकरणी मृत भाग्यश्री हालसे यांच्या वडिलांनी दिलेल्या फिर्यादीवरून औराद-शहाजनी पोलीस ठाण्यात आकस्मित मृत्यूची नोंद करण्यात आली आहे.

घरात पती- पत्नीचा मृतदेह आढळल्याने खळबळ; नागपुरमधील घटना

दरम्यान, नागपूर शहरातील सेमिनरी हिल्स परिसरात एअर फोर्समधील कर्मचारी आणि पत्नीचा मृतदेह आढळून आला आहे. राहत्या घरात दोघांचेही मृतदेह आढळून आल्याने एकच खळबळ उडाली असून आत्महत्या केल्याचा संशय व्यक्त करण्यात येत आहे. पोलीस याबाबतचा अधिक तपास करत आहेत.