Crime News: ५ वर्षांच्या चिमुकलीवर बलात्कार, मंदिरातील CCTV मध्ये घटना कैद; शेजारच्याचे भयंकर कृत्य

उत्तर प्रदेशमधील आग्रा जिल्ह्यात भयंकर घटना घडली. मंदिरातच ५ वर्षांच्या चिमुकलीवर बलात्कार करण्यात आला. ही घटना मंदिरामधील सीसीटीव्हीमध्ये कैद झाली. या घटनेमुळे आग्र्यामध्ये खळबळ उडाली. याप्रकरणी आरोपीविरोधात गुन्हा दाखल करत सीसीटीव्ही फुटेजच्या आधारे पोलिसांनी आरोपीला बेड्या ठोकल्या आहेत.

मिळालेल्या माहितीनुसार, चिमुकली मंदिराबाहेर खेळत होती. त्यावेळी तिच्या शेजारी राहणारा तरुण तिथे आला. हा तरुण या मुलीला आपल्यासोबत मंदिरात घेऊन गेला. त्याठिकाणी त्याने चिमुकलीवर बलात्कार केला. ही संपूर्ण घटना मंदिरातील सीसीटीव्हीत कैद झाली. मुलीच्या रडण्याचा आवाज ऐकून तिची आजी घाबरली. तिने तात्काळ मंदिराच्या दिशेने धाव घेतली. आरोपीने जेव्हा चिमुकलीच्या आजीला पाहिले तेव्हा त्याने तिला धक्का दिला आणि घटनास्थळावरून पळून जाण्याचा प्रयत्न केला.

चिमुकलीच्या आजीने आरडाओरडा केला तेव्हा आसापास राहणारे सर्वजण मंदिरात आले. त्यांनी आरोपीला पकडून चोप दिला आणि पोलिसांच्या ताब्यात दिलं. आरोपीचे नाव पवित्र उर्फ पम्मी असे आहे. पोलिसांनी आरोपीविरोधात गुन्हा दाखल करत त्याला अटक केली. पोलिसांनी चिमुकलीला तात्काळ रुग्णालयात नेलं. डॉक्टरांनी तपासून तिच्यावर बलात्कार झाल्याचे सांगितले.

या घटनेनंतर पोलिसांवर आरोप केला जात आहे की, पोलिसांनी आरोपीला ताब्यात घेऊन नंतर सोडून दिले. पण दबाव वाढल्यानंतर त्याला परत अटक करण्यात आली. या घटनेमुळे आग्र्यामध्ये संतापाचे वातावरण आहे. पोलिसांनी स्थानिकांना शांत राहण्याचे आवाहन केले आहे. आरोपीला कठोरात कठोर शिक्षा व्हावी अशी मागणी नागरिकांकडून केली जात आहे.