Viral Video News: अहिल्यानगर शहरात दरोडा टाकण्याच्या तयारीत असलेल्या दरोडेखोरांना पोलिसांनी सापळा रचून अटक केली. पकडले गेलेल्या आरोपींची शहरभर वरात काढत पोलिसांनी जनतेत सुरक्षिततेचा विश्वास निर्माण करण्याचा प्रयत्न केला. या घटनेने संपूर्ण शहरात एकच खळबळ उडाली असून नागरिकांनी पोलिसांच्या तत्पर कारवाईचे कौतुक केले आहे शिवाय संपूर्ण प्रकाराचा व्हिडिओ सोशल मीडियावर व्हायरल होत आहे.

नेमके घडले तरी काय?

अहिल्यानगर शहरातील सारसनगर भागात (दि.२२) मार्च रोजी पहाटे अज्ञात दरोडेखोरांनी योगेश चंगेडीया यांच्या घराचे दरवाजे आणि खिडकीचे शटर कटरच्या साह्याने तोडण्याचा प्रयत्न केला होता. मात्र, ही बाब लक्षात येत योगेश चंगेडीया यांनी आरडाओरड करत शेजारी असलेल्या लोकांना फोन (Phone) करून जागे केले होते त्यामुळे चोरट्यांनी त्या ठिकाणावरून पळ काढला होता.

या पळापळीमध्ये चोरट्यांनी आणलेली एक चार चाकी गाडी त्या ठिकाणीच सोडून चोरटे पळून गेले होते या पुराव्यांवर पोलिसांनी तपास केला असता, ते चार चाकी वाहनही चोरीचे निघाले होते. मात्र, सीसीटीव्हीच्या माध्यमातून पोलिसांनी तपास करून या प्रकरणात पाच आरोपींना ताब्यात घेतले होते हे सर्व आरोपी सराईत चोरटे असून दरोडा टाकण्याचे उद्देशाने ते योगेश चंगेडीया यांच्या घरी गेले होते याची कबुली ही या आरोपींनी दिल्यानंतर कोतवाली पोलिसांनी या आरोपींची आज ते ज्या भागात राहतात त्या परिसरात वरात काढली होती.

कुणीही गैर कृत्य करू नये कायद्यानुसार सर्वांना कठोर शिक्षा (Punishment) होईल तसेच या आरोपींना मदत करणाऱ्यांना सोडणारा नाही असा इशारा देत चोरी दरोडे घालण्यासारखा चुकीचा मार्ग सोडून चांगले जीवन जागा असा संदेशही यावेळी कोतवाली पोलीस ठाण्याचे पोलीस निरीक्षक प्रताप दराडे यांनी दिला आहे.

टीप: अहिल्यानगरमधील हा व्हिडीओ सोशल मीडियावर व्हायरल होत आहे. याची पडताळणी झालेली नाही. फक्त माहिती म्हणून आम्ही वाचक-प्रेक्षकांपर्यंत ही बाब पोहचवत आहोत. याचं आम्ही कोणत्याही प्रकारे समर्थन करत नाही.