सिंधुदुर्ग जिल्ह्यातील सावंतवाडीमध्ये एका शाळेत विद्यार्थ्यांना मारहाण झाल्याचा प्रकार व्हायरल व्हिडिओमुळे उघडकीस आलाय. ही घटना सुमारे दोन महिन्यांपूर्वी घडल्याची माहिती आहे. दरम्यान सोशल मीडियावर व्हिडिओ समोर आल्यानंतर स्थानिक स्तरावर संताप व्यक्त केला जातोय. या व्हिडिओमध्ये एका शिक्षकाने दोन विद्यार्थ्यांना लाकडी दांड्याने मारहाण केल्याचं दिसतंय.

मिळालेल्या प्राथमिक माहितीनुसार, हा व्हिडिओ सावंतवाडीतील एका मदरशातील असल्याचं म्हटलं जातंय. मारहाण झालेले दोन्ही विद्यार्थी अनाथ असल्याचं स्थानिक पातळीवर सांगण्यात येतंय. जात आहे. व्हिडिओमध्ये वर्गासारखी खोली असून शिक्षक विद्यार्थ्यांना काठीने मारताना दिसत असल्याचा आरोप करण्यात येतेय.

दरम्यान, स्थानिक प्रशासन आणि शिक्षण विभागाकडून या प्रकरणाची चौकशी सुरू होण्याची शक्यता व्यक्त केली जातेय. व्हिडिओची सत्यता, घटना घडलेली तारीख आणि संबंधित व्यक्तींची ओळख याची पडताळणी केल्यानंतर पुढील कारवाई केली जाऊ शकते.

व्हिडिओ सोशल मीडियावर व्हायरल होताच अनेकांनी या घटनेबाबत तीव्र प्रतिक्रिया व्यक्त केल्या. काही नागरिकांनी विद्यार्थ्यांवरील शारीरिक शिक्षेबाबत कठोर कारवाईची मागणी केली, तर काहींनी घटनेची सत्यता तपासूनच निष्कर्ष काढण्याचं आवाहन केलं.

विद्यार्थ्यांवर अशा शारीरिक शिक्षेचे प्रकार रोखण्यासाठी कडक नियम असूनही अशा घटना अधूनमधून समोर येतात. बालकांच्या मानसिक आणि शारीरिक सुरक्षिततेसाठी शाळांनी शिस्तीचे धोरण अवलंबणं आवश्यक असल्याचं मत अनेकांनी व्यक्त केलंय.