Viral Video: सोशल मीडियावर अनेक व्हिडीओ व्हायरल होत असतात. काही व्हिडीओ आपल्याला हसवतात, तर काही व्हिडीओ पाहून भीती वाटते. सध्या सोशल मीडियावर असाच एक व्हिडीओ पाहायला मिळत आहे. या व्हिडीओमधील तरुणाने ट्रेनच्या खालच्या भागातील ट्रॉलीमध्ये बसून तब्बल २५० किमीचा प्रवास केला आहे. जबलपूर रेल्वे स्टेशनवर या तरुणाला पकडण्यात आल्यानंतर त्याने ही माहिती पोलिसांना दिली.

व्हिडीओमधील तरुण ट्रेनच्या खाली बसून प्रवास करत होता. २५० किमीपेक्षा जास्त अंतर त्याने धोकादायक स्थितीमध्ये पार केले होते. लांबच्या पल्ल्याच्या ट्रेनच्या बोगीखाली ट्रॉली असते. या ट्रॉलीमध्ये लपून बसून त्याने हा जीवघेणा प्रवास केला होता. दरम्यान लोकांसह रेल्वे कर्मचाऱ्यांनी त्या तरुणाला पाहिले आणि त्याला बाहेर काढले. हा व्हिडीओ तेव्हा रेकॉर्ड करण्यात आला.

मध्यप्रदेशमधील जबलपूर रेल्वे स्थानकावर 12149 पुणे दानापूर एक्स्प्रेस आली. एक्स्प्रेस गाडी स्थानकावर थांबल्यानंतर रेल्वे कर्मचारी रोलिंग आणि अंडर गियर यांची चाचणी करु लागले. चाचणी सुरु असताना कर्मचाऱ्यांना ट्रेनच्या खालच्या बाजूला असलेल्या ट्रॉलीमध्ये एक तरुण असल्याचे दिसले. त्यांनी तरुणांना बाहेर काढले आणि रेल्वे पोलिसांकडे सुपूर्द केले. त्याने इटारसी ते जबलपूर हा २५० किमी लांब प्रवास अशा परिस्थितीमध्ये केला होता.

पश्चिम मध्य रेल्वे जबलपूरचे सीपीआर हर्षित श्रीवास्तव यांनी प्रकरणाची माहिती दिली. ट्रेनच्या बोगीखालच्या ट्रॉलीमध्ये बसून प्रवास करणाऱ्या तरुणाला आम्ही ताब्यात घेतले आहे. त्याच्यावर कारवाई केली जाणार आहे. ट्रॉलीमध्ये बसून २५० किमीचे अंतर कसे पार केले याची माहितीही आम्ही घेणार आहोत, असे हर्षित यांनी सांगितले. सध्यातरी जबलपूर रेल्वे पोलिसांनी तरुणाला ताब्यात ठेवले आहे.