Solapur Chaddi Gang CCTV video : सोलापूरकरांनो, जेव्हा तुम्ही रात्री साखर झोपेत असता तेव्हा तुमच्या गल्लीत, कॉलनीमध्ये चोरी करण्यासाठी चड्डी गैंग फिरत आहे. यामुळे सावधान राहा. शहरात गेल्या काही दिवसांपासून चोरी, घरफोडी आणि दुचाकी चोरीच्या घटना वाढत आहेत. त्यातच आता चड्डी गँगमुळे शहरवासीयांची झोप उडाली आहे. वसंत विहार, थोबडे नगर, स्वराज्य विहार, गुलमोहर सोसायटी,धानम्मा नगर आदी परिसरात रविवारी पहाटे साडेतीन ते साडेचारच्या दरम्यान चौघे चेहरा पूर्णतः काळ्या कापड्याने झाकून अंगावर काळा टी शर्ट अन् चड्डीवर फिरत असल्याचे दिसून आले.

शहरातील वाढत्या गुन्ह्यांवर आळा घालण्यासाठी पोलिसांकडून शहरातील सात पोलिस ठाणे हद्दीत अचानक नाकेबंदी करत तपासणी करण्याची मोहीम हाती घेतली आहे.शिवाय रात्री ही सशंयितांची तपासणी केली जात आहे. पोलिस एवढे सतर्क असूनही शहरात चड्डी गँग मोकाट फिरत आहे.ही सर्व चड्डी गँग सीसीटीव्ही कॅमेऱ्यात कैद झाली आहे.

वसंत विहार, गायत्री नगर,संकेत थोबडे नगर,निखिल थोबडे नगर,धानेश्वरी नगर,स्वराज नगर,आर्यनंदी नगरसह स्वराज्य विहार,व्यंकटेश्वर सिटी अशी उपनगरे वसली आहेत. जवळपास २५ हजारांहून अधिक नागरिक वास्तव्यास आहेत. महापालिकेला सर्वाधिक टॅक्स भरणारा हा परिसर आहे. नेमक्या अशाच परिसराला हेरुन चड्डी गँग लक्ष्य करीत आहे.