अमोल कलये, साम टीव्ही

रत्नागिरी जिल्ह्यात मागील ४८ तासांपासून मुसळधार पाऊस सुरू असून खेड तालुक्यातील जनजीवन विस्कळीत झालं आहे. नारंगी आणि जगबुडी नदीला मोठा पूर आल्याने खेड शहरात पाणी शिरलंय. त्यामुळे अनेकांचे संसार उघड्यावर पडले आहेत. सध्या प्रशासनाकडून पूरस्थितीचा आढावा घेतला जातोय. अशातच खेड तालुक्यातील शेल्डी धरणाच्या प्रवाहातून एक 32 वर्षीय तरुण वाहून गेल्याची धक्कादायक घटना घडली.

जेव्हा हा तरुण वाहून जात होता. तेव्हा त्याच्यासोबत असलेल्या इतर मित्रांनी त्याला वाचवण्याचा प्रयत्न केला. मात्र, प्राण्याच्या प्रवाहासमोर त्यांचं काही चाललं नाही. ही थरारक घटना मोबाइल कॅमेऱ्यात कैद (Viral Video) झाली आहे. पुराच्या पाण्यातून प्रवास करण्याचं धाडस करू नका, असं आवाहन प्रशासनाकडून केलं जातंय.

प्राप्त माहितीनुसार, जयेश रामचंद्र आंब्रे (वय 32) असं पुराच्या पाण्यात वाहून गेलेल्या तरुणाचं नाव आहे. सध्या बचावपथकाचे जवान जयेश याचा शोध घेत आहेत. या घटनेनं परिसरातून हळहळ व्यक्त होत आहे. दरम्यान, खेड तालुक्यात (Ratnagiri Rain News) ढगफुटीसदृश्य पाऊस झाला आहे. त्यामुळे भयावह पूरसदृश्य परिस्थिती पाहायला मिळत आहे. शेकडो हेक्टर भातशेती पाण्याखाली गेली आहे.

अनेक मार्ग पाण्याखाली गेल्याने वाहतुकीचे मार्ग ठप्प जाले आहेत. खेड शिवतर मार्गावर शिवतर ते नामदेव वाडी यादरम्यान मोठ्या प्रमाणावर भूस्खलन होऊन रस्त्याचा मोठा भाग वाहून गेला आहे. त्यामुळे या मार्गावरील वाहतूक बंद करण्यात आली आहे. कशेडी घाटाला पर्याय असणाऱ्या खेळविणेरे मार्गावर देखील मातीचा भराव आल्याने हा मार्ग देखील बंद करण्यात आलाय. सध्या सर्वच ठिकाणी पोलीस, आपत्ती व्यवस्थापन मदतकार्य राबवत आहेत.