कुत्रा, मांजर या पाळीव प्राण्यांना आंघोळ घालताना तुम्ही पाहिलं असेल. मात्र सापाला आंघोळ घालताना कधी पाहिलं किंवा ऐकलंय का ? सोशल मीडियावर अनेकदा बरेच व्हिडिओ व्हायरल होतात. प्राणी, पक्षी तर कधी मानवी जीवनाशी संबंधीतही हे व्हिडिओ असतात. अशातच आता एका तरुणाने चक्क सापाला शॅम्पूने आंघोळ घातल्याची व्हिडिओ व्हायरल होत आहे.

व्हिडिओमध्ये दिसून येते की ती व्यक्ती आपल्या घराबाहेर जमिनीवर बसून आहे. त्याच्या शेजारी एक पांढरी शॅम्पूची बाटली ठेवलेली आहे. तो बाटलीतून शॅम्पू काढतो आणि सापाच्या डोक्यापासून शेपटापर्यंत पूर्ण अंगावर चोळतो. त्यानंतर सापाला व्यवस्थितपणे पाण्याने धुतल्याचेही दिसते. साप काही वेळा हातातून सुटण्याचा प्रयत्न करतो पण त्या व्यक्तीने त्याला घट्ट पकडले आणि आंघोळ पूर्ण घातली.

हा व्हिडिओ पाहून अनेकांना धक्का बसला आहे. काहींनी यावर टीका केली आहे. साप हा एक वन्यप्राणी असून, त्याच्याशी अशा प्रकारे वागणे हे प्राण्यांशी छेडछाड करण्यासारखे असल्याचे मत काहींनी व्यक्त केले आहे. वन्यजीव प्रेमींनी तर याला गंभीरपणे घेत, अशा कृतींनी प्राणी आणि माणूस दोघांनाही धोका निर्माण होऊ शकतो, असा इशारा दिला आहे.

विशेष म्हणजे, अनेक वेळा काही जण केवळ सोशल मीडियावर प्रसिद्धी मिळवण्यासाठी असे धोकादायक प्रयोग करतात. व्ह्यूज आणि फॉलोअर्स वाढवण्यासाठी ते प्राण्यांवर अशा प्रकारचे प्रयोग करतात, ज्यामुळे अनावधानाने त्या प्राण्यांच्या आरोग्यावर परिणाम होऊ शकतो. सापाच्या अंगावर रसायनयुक्त शॅम्पू लावणे त्याच्यासाठी घातक ठरू शकते, असा इशाराही तज्ज्ञांनी दिला आहे.

या घटनेनंतर पुन्हा एकदा सोशल मीडियावरील अशा धोकादायक ट्रेंड्सवर प्रश्नचिन्ह उभे राहिले आहे. लोकांनी केवळ व्हायरल होण्यासाठी जीवघेण्या कृती टाळल्या पाहिजेत, अन्यथा त्याचे गंभीर परिणाम भोगावे लागू शकतात.