संदिप चव्हाण, साम टीव्ही

मुंबई : सावधान...! तुम्ही जोरजोरात डीजेचा आवाज वाढवून नाचत असाल तर सावध व्हा. कर्णकर्कश्श आवाजात डीजेवर थिरकणं जीवावर बेतू शकतं. अशाच प्रकारे एका 40 वर्षीय व्यक्तीला डीजेवर नाचणं महागात पडलंय. डीजेच्या आवाजामुळे या व्यक्तीच्या मेंदूचं रक्त गोठलं आणि त्याला ब्रेन हॅमरेज झाल्याचा दावा करण्यात आलाय.

व्हायरल मेसेजमध्ये काय म्हटलंय पाहुयात... डीजेमुळे छत्तीसगडमध्ये एका 40 वर्षीय व्यक्तीची मेंदूची नस फाटली आणि त्याला ब्रेन हॅमरेज झालं. या व्यक्तीवर रुग्णालयात उपचार सुरू आहेत. ब्रेन हॅमरेज झालेल्या व्यक्तीला कुठलाही आजार नव्हता. ब्लड प्रेशरही नॉर्मल होतं, असं त्यात मेसेजमध्ये म्हटलं आहे.

ज्या व्यक्तीला डीजेमुळे ब्रेन हॅमरेज झालाय त्याला कुठलाही आजार नव्हता. तरीदेखील या व्यक्तीला डीजेच्या आवाजाचा त्रास झालाय. संजय जैस्वाल असं या व्यक्तीचं नाव असून, 40 वर्षांचा आहे. छत्तीसगडचा रहिवासी आहे. तंदुरुस्त असतानाही त्याला डीजेच्या आवाजाचा त्रास झालाय. त्यामुळे काय खबरदारी बाळगायला हवी हे आम्ही एक्सपर्टकडून जाणून घेतलं.

त्यामुळे आमच्या पडताळणीत काय सत्य समोर आलंय पाहुयात...

डीजेचा कर्णकर्कश आवाज सगळ्यांनाच सहन होत नाही

डीजेचा आवाज 150 डेसीबल पेक्षाही अधिक असतो

माणूस जास्तीत जास्त 70 डेसीबल ध्वनीची तीव्रता सहन करु शकतो

कर्णकर्कश आवाजामुळे मेंदूवर अत्यंत वाईट परिणाम होतो

शरीरातील रक्त गोठून नसा फाटू शकतात

छत्तीसगडमध्ये एका तरुणाचं रक्त गोठून मेंदूतील नसा फाटल्या.

गणेशोत्सवासह अनेक सण-उत्सवाच्या मिरवणुकीत, लग्नात, हळदी कार्यक्रमात जोरजोरात डीजे वाजवला जातो. मात्र, कर्णकर्कश्श आवाजामुळे अनेकांना त्रास होतो. लहान मुलं, गर्भवती, वृद्ध, आजारी असलेल्यांना या आवाजाचा त्रास होतोच. मात्र, आता ठणठणीत असलेल्यांनाही डीजेचा त्रास होत असल्याचा दावा आमच्या पडताळणीत सत्य ठरलाय. आपण सण साजरे करताना ढोल-ताशे-डीजे लावून नाचतो. मात्र, आवाज कमी प्रमाणात ठेवून उत्सव साजरा केला तर याचा कुणालाच त्रास होणार नाही.