Delhi Viral Video:

राजधानी दिल्लीमध्ये गुन्हेगारी घटनांमध्ये मोठी वाढ झाल्याचे दिसत आहे. दिल्लीमध्ये खून, मारामाऱ्या असले प्रकार सर्रास घडत असल्याचे पाहायला मिळत आहे. त्यामुळे कायदा आणि सुव्यवस्थेचा प्रश्न गंभीर होत चालला आहे. गुंडांना पोलिसांची भिती आहे की नाही? असा प्रश्न उपस्थित होत आहे. असाच एक धक्कादायक व्हिडिओ सध्या सोशल मीडियावर व्हायरल होत आहे.

सोशल मीडियावर (Social Media) व्हायरल होत असलेल्या एका व्हिडिओमध्ये तीन दुचाकीस्वार हातात चाकू घेऊन दिल्लीच्या (Delhi) रस्त्यावर बेधडकपणे फिरताना दिसत आहेत. या दुचाकीस्वारांनी एका हातात चाकू आणि दुसऱ्या हातात दारूची बॉटल धरल्याचे दिसत आहेत. एवढेच नाही तर हे तरुण एकत्र येऊन गोंधळही घालताना दिसत आहेत.

वर्दळीच्या रस्त्यावर, वाहनांची गर्दी असतानाही या तरुणांची हुल्लडबाजी पाहायला मिळत आहे. गाडीवरील एक तरुण दुचाकीवर उभे राहत आहे तर दुसरा तरुण हातातील कोयता दाखवताना दिसत आहे. हा संपूर्ण थरार पाठीमागे असलेल्या एका कार चालकाने आपल्या मोबाईलमध्ये कैद केला आहे. या घटनेवरुन दिल्लीमधील गुन्हेगारी कोणत्या थराला गेली हेच दिसून येते.

 ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

@prerna82349124 नावाच्या एक्स अकांउटवरुन हा व्हिडिओ शेअर करण्यात आला आहे. सोबतच "तीन मुले दिल्लीच्या रस्त्यांवर बेधडकपणे फिरत आहेत. हातात बाटल्या आणि चाकू फिरवत आहेत, असा कॅप्शन या व्हिडिओला देण्यात आला आहे. व्हिडिओ समोर आल्यानंतर नेटकऱ्यांनी त्यावर संतापजनक प्रतिक्रिया दिल्या आहेत. काही जणांनी या तरुणांवर कारवाई करण्याचीही मागणी केली आहे. (Latest Marathi News)