संदीप भोसले, लातूर

लातूरच्या निलंगा तालुक्यातील अंबुलगा मेन येथील जिल्हा परिषद शाळेत धक्कादायक प्रकार समोर आला आहे. शाळेतील एक शिक्षक मद्यधुंद अवस्थेत शाळेत आल्याचा आरोप पालकांनी केला. हा प्रकार लक्षात येताच संतप्त पालकांनी शाळेत धाव घेत संबंधित शिक्षकाला पोलिसांच्या ताब्यात दिले.

या घटनेमुळे शाळा परिसरात काही काळ तणावाचे वातावरण निर्माण झाले. विद्यार्थ्यांच्या सुरक्षिततेचा प्रश्न उपस्थित करत पालकांनी संबंधित शिक्षकावर कठोर कारवाईची मागणी केली आहे. घटनेची माहिती मिळताच पोलिसांनी घटनास्थळी पोहोचून संबंधित शिक्षकाला ताब्यात घेतले. त्यानंतर वैद्यकीय तपासणीसह पुढील कायदेशीर प्रक्रिया सुरू आहे.