आयपीएस अधिकारी देवेन भारती यांची मुंबईचे नवे पोलीस आयुक्त म्हणून नियुक्ती केली आहे. विवेक फणसाळकर हे आज, ३० एप्रिलला निवृत्त झाले. त्यानंतर देवेन भारती यांची आयुक्तपदी नियुक्ती करण्यात आली आहे. याआधी त्यांनी मुंबईच्या विशेष पोलीस आयुक्तपदावर काम केले आहे. हे पद नव्यानेच निर्माण केले होते आण त्या पदावर भारती यांची नियुक्ती करण्यात आली होती.

देवेन भारती हे १९९४ च्या बॅचचे आयपीएस अधिकारी आहेत. त्यांची मुंबईचे पहिले विशेष पोलीस आयुक्त म्हणून नियुक्ती करण्यात आली होती. एप्रिल २०१५ मध्ये भारती यांची मुंबईच्या सह पोलीस आयुक्तपदी (कायदा आणि सुव्यवस्था) नियुक्ती करण्यात आली होती. या पदावर त्यांनी सर्वाधिक काळ काम केलं. देवेन भारती यांनी अनेक हाय प्रोफाइल प्रकरणांचा तपास केला आहे. त्यात मुंबईवरील २६/११ ला झालेला दहशतवादी हल्ला, जे. डे. हत्याकांड यांसारख्या प्रकरणांचा तपास त्यांनी केला आहे. इंडियन मुजाहिद्दीन या दहशतवादी संघटनेचे महाराष्ट्रातील नेटवर्क उद्ध्वस्त करण्यात देवेन भारती यांचा मोठा वाटा होता, असं बोललं जातं.