हिंगोलीत शेतकऱ्याच्या केळी बागेवर अज्ञात व्यक्तीने विषप्रयोग केल्याचा धक्कादायक प्रकार पुढे आला आहे. वसमत तालुक्यातील दिग्रस खुर्द गावच्या शिवारात हा विष प्रयोग करण्यात आला आहे. या विषप्रयोगामुळे बाजारपेठेत विक्री करण्यासाठी आलेल्या केळी नष्ट झाली आहेत. विषप्रयोगामुळे हातातोंडाशी आलेले केळीचे तीन हजार झाडे उध्वस्त झाली आहेत. यामध्ये शेतकरी गणेश मोकळे यांचे 11 लाख रुपयांचे आर्थिक नुकसान झाले आहे. विषप्रयोगाच्या या प्रकारानंतर हिंगोलीसह परिसरातील केळी उत्पादक शेतकऱ्यांमध्ये खळबळ उडाली आहे.

दरम्यान, याप्रकरणी नुकसानग्रस्त शेतकऱ्याने पोलीस कुरुंदा पोलीस स्थानकात अज्ञात व्यक्ती विरोधात तक्रार दाखल केली आहे. तसेच पोलीस प्रशासनाने तातडीने या प्रकरणाचा तपास करून कार्यवाही करण्याची मागणी केली आहे. तर तातडीने सरकारने नुकसान भरपाई द्यावी, अन्यथा आत्महत्या शिवाय पर्याय नसल्याचे देखील नुकसान झालेले शेतकरी गणेश साहेबराव मोकळे यांनी म्हटले आहे.