विशाल बोपचे नामक एका तरुणाचा 8 जुलै रोजी अपघातात झाला होता. मृत विशालकडे युनियन बँकेचे एटीएम कार्ड होते, ज्यामध्ये अपघात विम्याचा लाभ मिळण्याची अट होती. मात्र, मृतकाच्या कुटुंबीयांनी जेव्हा नुकसानभरपाईसाठी बँकेकडे धाव घेतली, तेव्हा बँक मॅनेजरने एफआयआर कॉपी मराठीत आहे या कारणावरून विमा नाकारला. त्यामुळे कुटुंबीयांना मोठ्या अन्यायाला सामोरं जावं लागत आहे.

या प्रकाराचा निषेध करत महाराष्ट्र नवनिर्माण सेनेचे पदाधिकारी आज सेमिनरी हिल्स टीव्ही टॉवरजवळील युनियन बँकेच्या शाखेत पोहोचले असून, संबंधित बँक मॅनेजरला जाब विचारण्यासाठी त्यांनी उपस्थिती लावली आहे. एफआयआरमध्ये मराठी आणि इंग्रजी दोन्ही भाषांचा वापर असतो, तरीही फक्त मराठीत असल्याचे कारण देत इन्शुरन्स कंपनी आणि बँकेने भरपाई नाकारल्याने नव्या वादाला तोंड फुटले आहे. या घटनेमुळे प्रशासन आणि बँकिंग व्यवस्थेवर अनेक प्रश्न उपस्थित होत आहेत.