मुंबई : विनोद तावडे प्रकरणामुळे राजकीय वातावरण ढवळून निघालं आहे. मतदानाच्या आदल्या दिवशी पैसे वाटप केल्याच्या आरोपावरून विरोधकांनी विनोद तावडे यांना घेरलं आहे. या आरोपानंतर विनोद तावडे यांनी आरोपाचं खंडन केलं आहे. मात्र, या आरोपावर उद्धव ठाकरे यांनी पहिली प्रतिक्रिया दिली आहे.

विनोद तावडे प्रकरणावर उद्धव ठाकरे म्हणाले, हा तर महायुतीचा नोट जिहाद आहे. मी आज तुळजापूरला दर्शनासाठी गेलेलो माझी पण बॅग आज तपासण्यात आली. काल नाशिक आज विनोद तावडेंकडे पैसे सापडले अशा बातम्या येताहेत. अनिल देशमुखांवर जो दगड मारला तो कोणी शोधायचा? निवडणूक आयोगाने!'.

'माझ्याकडे कुठला पुरावा नाही. पण ज्या बातम्या येताहेत, त्यानुसार तो "वोट जिहाद" आहे. निष्पक्षपणे निवडणूक आयोगाने यावर कारवाई करायला हवी. काल नाशिकला जो शिंदे गटाकडे पैसे मिळाल्याच्या बातम्या येताहेत, त्यानुसार हा त्यांचा आपसातला गँगवॉर असू शकतो. नाशिकला ज्यांच्याकडे पैसे मिळाले ते पळून गेले, तावडे तावडीत सापडले असतील तर त्यांच्यावर सुद्ध कारवाई व्हावी. महाराष्ट्रातील जनता यावर निर्णय घेईल, असे उद्धव ठाकरे म्हणाले.