तुळजापूर ड्रग्ज प्रकरणातील जामिनावर बाहेर असलेला आरोपी आणि माजी नगराध्यक्ष संतोष परमेश्वरने भाजपमध्ये प्रवेश केला आहे. अखंड राष्ट्रवादी काँग्रेस पक्षाचा सदस्य असताना परमेश्वरने तुळजापूरचे नगराध्यक्षपद भूषवले होते. तुळजापूरचे भाजप आमदार राणा जगजितसिंह पाटील यांच्या उपस्थितीत हा पक्षप्रवेश झाल्याने आगामी नगरपालिका निवडणुकीच्या पार्श्वभूमीवर राजकीय चर्चांना उधाण आले आहे. तुळजापूर ड्रग्ज प्रकरण महाराष्ट्रमध्ये गाजलेले ड्रग्ज प्रकरण आहे. या पक्षप्रवेशावर प्रश्नचिन्ह निर्माण झाले असून चर्चा सुरू आहे. आता ड्रग्ज प्रकरणातील आरोपीला भाजपने पक्षात स्थान दिल्याने राजकीय वर्तुळात मोठी खळबळ उडाली आहे.

अखंड राष्ट्रवादी असताना संतोष परमेश्वर यांनी तुळजापूरचं नगराध्यक्षपद भूषवलं होतं. विधानसभा निवडणुकीदरम्यान काँग्रेस उमेदवार धीरज पाटील यांना संतोष परमेश्वर यांनी साथ दिली होती. त्यानंतर आता नगरपरिषद निवडणुकीसाठी आमदार राणाजगजीतसिंह पाटील यांच्या नेतृत्वात भाजपमध्ये पक्षप्रवेश केला आहे. तुळजापूर ड्रग्ज प्रकरणात आरोपी असल्याने पक्षप्रवेशाची राजकीय वर्तुळात चर्चा सुरू झाली आहे. तुळजापूर नगरपरिषद निवडणुकीमध्ये ड्रग्जचा मुद्दा चर्चेत येणार आहे.